O‘zbekiston Respublikasi Vazirlar Mahkamasining 2021 yil 3 iyundagi 344-son qarori bilan tasdiqlangan O‘zbekiston Respublikasi oliy taʼlim muassasalari talabalariga akademik taʼtil berish to‘g‘risidagi Nizomga muvofiq, akademik taʼtil berishda talaba o‘qiyotgan kursga nisbatan cheklov mavjud emas. Bundan oldin amalda bo‘lgan nizomga ko‘ra, birinchi kurs talabalariga akademik taʼtil faqat talabalarning kasalligi tufayligina berilishi mumkin bo‘lgan.

Ushbu tartib 2021/2022 o‘quv yilidan eʼtiboran bekor qilingan.

O‘rnatilgan yangi tartibga muvofiq akademik taʼtil o‘quv yilining har qanday qismida beriladi va o‘qish davomida akademik taʼtil berilishi bo‘yicha miqdoriy cheklovlar bekor qilingan.

Talabalarga akademik taʼtil quyidagi hollarda berilishi mumkin:

• harbiy xizmatni o‘tash uchun;
• salomatligini tiklash uchun;
• homiladorlik va tug‘ish uchun;
• bolalarni parvarish qilish uchun;
• oilasining betob aʼzosini (otasi, onasi yoki ularning o‘rnini bosuvchi shaxslar, turmush o‘rtog‘i, farzandi) parvarish qilish uchun.

Foydali havolalar:

• Akademik taʼtil 
• O‘qishni ko‘chirish, chetlatish va tiklash 
• Oliy taʼlim muassasalarida ikkinchi va undan keyingi taʼlimni olish tartibi