Ҳуқуқий маслаҳат - бепул, тезкор, ҳаммага!

  • 11988 марта ўқилди

Болаликдан ногиронлиги бўлган шахсларга ва 18 ёшга тўлмаган ОИВ инфекцияси ёки орфан касаллигига чалинган шахсларга нафақалар

Ушбу нафақа тури қуйидаги шахсларга тайинланади:

  • болаликдан I гуруҳ ногиронлиги бўлган шахслар;
  • 18 ёшдан катта болаликдан II гуруҳ ногиронлиги бўлган шахслар;
  • ўн саккиз ёшга тўлмаган ОИВ инфекциясига ва орфан касаллигига чалинганлар
  • тегишли тиббий хулосага асосан 18 ёшгача ногиронлиги бўлган болалар;

Нафақа миқдори 698 000 сўмни ташкил қилади.

Нафақа тайинлаш тўғрисидаги ариза

Нафақа тайинлаш тўғрисидаги ариза:

  • ОИВ инфекциясига ёки орфан касаллигига чалинган шахс, 18 ёшдан катта болаликдан ногиронлиги бўлган шахс томонидан;
  • ОИВ инфекциясига ёки орфан касаллигига чалинган шахснинг ва муомалага лаёқатсиз деб эътироф этилган 18 ёшдан катта болаликдан ногиронлиги бўлган шахснинг ота-онаси, фарзандликка олувчиси, васийси ёки ҳомийси томонидан;
  • ногиронлиги бўлган боланинг, шунингдек ОИВ инфекциясига ёки орфан касаллигига чалинган 18 ёшга тўлмаган боланинг ота-онаси, фарзандликка олувчиси, оилага тарбияга олган (патронат) тутинган ота-онаси (кейинги ўринларда — тутинган ота-она), васийси ёки ҳомийси томонидан давлат хизматлари марказлари ёки ЯИДХП орқали мурожаат қилади.


Нафақа барча зарур ҳужжатлар мавжуд бўлган тақдирда мурожаат қилинган кундан бошлаб тайинланади.

  • 18 ёшдан катта болаликдан ногиронлиги бўлган шахсга нафақа ногиронликнинг бутун даврига тайинланади.
  • Ногиронлиги бўлган болага нафақа тиббий хулоса берилган муддатга тайинланади.
  • ОИВ инфекцияси ёки орфан касаллигига чалинган шахсга нафақа у 18 ёшга тўлгунгача бўлган муддатга тайинланади.

Нафақа тайинлашни рад этиш тўғрисидаги қарор судга шикоят қилиш мумкин.


Нафақа тўлаш қуйидаги ҳолларда тўхтатилади:

  • давлат пенсияси турларидан бири тайинланганда;
  • нафақа олувчи доимий яшаш учун Ўзбекистондан чиқиб кетганда;
  • нафақа тайинланган шахслар тўлиқ давлат таъминотига ўтказилганда;
  • озодликдан маҳрум этишга ҳукм этилган тақдирда.

Ҳаётий мисол

Савол: Н. исмли шахс вояга етмаган ўғли болаликдан ногиронлик нафақаси олиб келаётганлиги, яқинда эса унга нисбатан боқувчисини йўқотганлик пенсияси тайинланганлиги, шундай ҳолатда ўғли ногиронлик нафақаси ёки боқувчисини йўқотганлик пенсиясидан бирини олиш ҳуқуқини йўқотиши ёки йўқотмаслиги ҳақида тушунтириш беришни сўради. 

Жавоб: Ногиронлиги бўлган болага, шунингдек, ОИВ инфекциясига чалинган 18 ёшга тўлмаган болага тайинланган нафақа унга бошқа пенсиялар ва нафақалар, шу жумладан, боқувчисини йўқотганлик пенсияси ёки нафақаси олишидан қатъи назар тўланади.

Демак, Н. исмли шахснинг вояга етмаган ўғли ушбу ҳолатда бир вақтнинг ўзида, ҳам ногиронлик нафақасини, ҳам боқувчисини йўқотганлик пенсиясини олиш ҳуқуқига эга.

Chat