Poytaxtda yangi obyektlarni qurishda muhandislik tarmoqlari, ijtimoiy infratuzilma va ekologik holatga tushadigan yuklamani hisobga olishga qaratilgan yangi yondashuv muhokama qilindi.

15-sentabr kuni Prezident Administratsiyasi rahbari Saida Mirziyoyeva yirik arxitektura loyihalari tashabbuskorlari, mustaqil mutaxassislar, urbanistlar, shuningdek, sohadagi yetakchi studiya va oliy ta’lim muassasalari vakillari bilan uchrashdi.

Uchrashuvda Toshkentda tartibsiz qurilishlarning oldini olish, yangi obyektlarni shahar muhiti va mavjud kommunikatsiyalarga ortiqcha zarar yetkazmagan holda barpo etish imkonini beruvchi tizimni shakllantirish masalalari muhokama qilindi.

Yangi qurilish shaharni rivojlantirishi kerak, uning infratuzilmasiga qo‘shimcha nomutanosiblik va ortiqcha yuklama keltirib chiqarmasligi lozim.

Qayd etilishicha, poytaxtning tez sur’atlarda o‘sishi natijasida yangi qurilishlarni rejalashtirishda faqat binoning o‘zi emas, balki uning atrofdagi elektr energiyasi, suv ta’minoti, muhandislik tarmoqlari va ijtimoiy obyektlarga ta’siri ham hisobga olinishi kerak.

Shu bilan birga, faqat kelgusidagi qurilishlarni tartibga solish emas, balki ijtimoiy soha va muhandislik tarmoqlarida hozirdan mavjud bo‘lgan ortiqcha yuklama bilan bog‘liq muammolarni bartaraf etish ham muhim vazifa sifatida ko‘rsatildi.

Saida Mirziyoyeva Toshkentni yanada obod, toza va xavfsiz qilishga qaratilgan loyihalarni amalga oshirish istagida bo‘lgan tadbirkorlarni qo‘llab-quvvatlash zarurligini ham ta’kidladi.

Muhim: hozircha mazkur tizimning aniq mexanizmi, qurilish loyihalari uchun yangi mezonlar yoki ularni joriy etish sanasi e’lon qilinmagan. Gap yangi yondashuvni ishlab chiqish va joriy etish masalasi haqida ketmoqda.