Hukumat qarori (171-son, 15.04.2026 y.) bilan Vazirlar Mahkamasining 2023 yil 20 noyabrdagi 612-son qarori bilan tasdiqlangan Jismoniy va yuridik shaxslarga maʼlumotnomalar berish bo‘yicha davlat xizmatlarini ko‘rsatishning yagona maʼmuriy reglamentiga o‘zgartirish va qo‘shimcha kiritildi.

Qarorga muvofiq, kommunal xizmatlardan qarzdorlik mavjud emasligi to‘g‘risida maʼlumotnoma berish pasporti tasdiqlandi.

Unga ko‘ra, so‘rovnomada shaxsga oid quyidagi maʼlumotlar ko‘rsatiladi:

♦ jismoniy shaxs uchun:

▫️ familiyasi, ismi va otasining ismi;
▫️ pasport yoki identifikatsiyalovchi ID-kartasi maʼlumotlari;
▫️ maʼlumotnoma tili (o‘zbek/rus);
▫️ elektron manzili (mavjud bo‘lsa) va telefon raqami;
▫️ kadastr raqami;

♦ yuridik shaxs uchun:

▪️ to‘liq nomi;
▪️ telefon raqami;
▪️ STIR;
▪️ kadastr raqami;
▪️ abonent hisobraqami (mavjud bo‘lsa).

Davlat xizmati bepul ko‘rsatiladi.

Maʼlumot uchun: 2025 yil 16 sentyabrdagi PQ–286-son qarorda kommunal xizmatlardan qarzdorlik mavjud emasligi to‘g‘risida maʼlumotnoma berish bo‘yicha davlat xizmatini YIDXP (my.gov.uz) orqali joriy etish belgilangan.