O‘zbekistonda paxta va g‘alla yetishtirishda zamonaviy agrotexnologiyalarni qo‘llay oladigan yosh mutaxassislarni tayyorlash hamda yuqori hosildor fermerlar tajribasini boshqa xo‘jaliklarga o‘rgatishning yangi mexanizmlari yo‘lga qo‘yildi.

Vazirlar Mahkamasining 2026-yil 24-sentabrdagi 513-son qarori bilan paxta va g‘alla yetishtirishda “Yangi agronom” tayyorlash hamda “Ustoz-shogird” tizimlarini joriy etish belgilandi. Qaror 28-sentabrdan kuchga kirgan.

Talabalar dala sharoitida amaliy tajriba orttiradi

“Yangi agronom” tizimiga Toshkent davlat agrar universiteti va qishloq xo‘jaligi sohasida mutaxassis tayyorlaydigan boshqa oliy ta’lim tashkilotlarining tegishli yo‘nalishlarida o‘qiyotgan 2 va 3-bosqich talabalari tanlov asosida jalb qilinadi.

Tanlov oliy ta’lim tashkilotlarida har yili kamida bir marta tashkil etiladi. Talabalar yangi agrotexnologiyalar asosida paxta va g‘alla yetishtirish jarayonlarida amaliy ko‘nikmalarga ega bo‘ladi.

Amaliyotni a’lo baholar bilan yakunlagan talabalar maxsus komissiya tomonidan saralanib, ilg‘or xorijiy tajribani o‘rganish uchun chet davlatlarga yuboriladi.

Yuqori hosil olgan fermerlar “ustoz” bo‘ladi

“Ustoz-shogird” tizimi doirasida Qoraqalpog‘iston Respublikasi Vazirlar Kengashi va viloyatlar hokimliklari paxtadan gektariga 50–60 sentnerdan yuqori hosil olgan ilg‘or agroklasterlar va fermer xo‘jaliklariga “ustoz” sifatida tanlovda ishtirok etishni taklif qiladi.

Tanlab olingan har bir “ustoz” xo‘jalikka paxta hosildorligi gektariga 30 sentnerdan past bo‘lgan 20 tagacha fermer xo‘jaligi “shogird” sifatida biriktiriladi.

“Ustoz” fermer yoki agroklaster o‘z tajribasini shogird xo‘jaliklarga yetkazish, zamonaviy agrotexnologiyalarni qo‘llash va hosildorlikni oshirishga ko‘maklashadi.

Natija uchun 5 mln so‘m mukofot

Har bir hosil yili yakunida “shogird” fermer xo‘jaligi paxtadan gektariga 50 sentnerdan yuqori hosil olsa, unga biriktirilgan “ustoz” agroklaster yoki fermer xo‘jaligi har bir muvaffaqiyatli “shogird” uchun 5 mln so‘mdan mukofotlanadi.

Bitta “ustoz”ga 20 ta xo‘jalik biriktirilgan va ularning barchasi belgilangan natijaga erishgan taqdirda, mukofot jami 100 mln so‘mgacha yetishi mumkin. Bu har bir muvaffaqiyatli shogird uchun belgilangan 5 mln so‘mlik rag‘batdan kelib chiqadi. 

Jarayon raqamli nazorat qilinadi

“Ustoz-shogird” tizimidagi ishlar Qishloq xo‘jaligi vazirligining “Raqamli qishloq xo‘jaligi” yagona integratsion platformasi orqali nazorat qilinadi.

Shuningdek, “ustoz” sifatida tanlangan agroklaster va fermer xo‘jaliklari hamda ularga biriktirilgan “shogird” xo‘jaliklarining reyestri Qishloq xo‘jaligi vazirligi tomonidan yuritiladi.

Huquqiy asoslar

O‘zbekiston Respublikasi Vazirlar Mahkamasining 2026-yil 24-sentabrdagi 513-son “Paxta va g‘alla yetishtirishda ‘yangi agronom’ tayyorlash va ‘ustoz-shogird’ tizimlarini joriy etish to‘g‘risida”gi qarori.