Vasiyatnoma bo‘yicha vorislik

Vasiyat erkinligi

Fuqaro o‘zining barcha mol-mulkini yoki uning muayyan qismini:

qonun bo‘yicha merosxo‘rlarga;
merosxo‘rlar doirasiga kirmaydigan boshqa shaxslarga;
yuridik shaxslarga;
davlatga;
fuqarolarning o‘zini o‘zi boshqarish organlariga vasiyat qilishi mumkin.

Vasiyat qiluvchi bir yoki bir nechta qonuniy merosxo‘rni sababini ko‘rsatmasdan merosdan mahrum qilishga haqli.

Vasiyatnoma shaxsan tuziladi, yozilgan joyi va vaqti ko‘rsatilib, yozma shaklda rasmiylashtiriladi.

Vasiyatnomani o‘zgartirish va bekor qilish

Vasiyat qiluvchi istalgan vaqtda:

yangi vasiyatnoma tuzish;
vasiyatnomani o‘zgartirish;
vasiyatnomani to‘ldirish;
uni to‘liq bekor qilish huquqiga ega.

Buning uchun merosxo‘rlarning yoki boshqa shaxslarning roziligi talab qilinmaydi.

Muhim! Yangi vasiyatnoma avvalgi vasiyatnomani to‘liq yoki unga zid bo‘lgan qismida bekor qiladi.

Vasiyatnoma notarial tasdiqlangan yoki qonunda belgilangan hollarda notarial tasdiqlangan vasiyatnomaga tenglashtirilgan bo‘lishi mumkin.

Merosdan majburiy ulush

Vasiyat erkinligi mutlaq emas. Meros qoldiruvchining:

voyaga etmagan yoki mehnatga qobiliyatsiz bolalari;
mehnatga qobiliyatsiz eri yoki xotini;
mehnatga qobiliyatsiz ota-onasi

vasiyatnoma mazmunidan qat’i nazar, qonun bo‘yicha ularga tegishi lozim bo‘lgan ulushning kamida yarmini majburiy ulush sifatida oladi.

Vasiyat majburiyati

Vasiyat qiluvchi merosxo‘r zimmasiga bir yoki bir nechta shaxs foydasiga muayyan mulkiy majburiyatni bajarish vazifasini yuklashi mumkin.

Merosxo‘r bu majburiyatni o‘ziga o‘tgan merosning qarzlar chegirilgandan keyingi haqiqiy qiymati doirasida bajaradi.

E’tibor bering! Vasiyatnoma mavjudligi meros qoldiruvchining qarzlarini bekor qilmaydi. Qarzlar meros tarkibida hisobga olinadi.

Tartib O‘zbekiston Respublikasining Fuqarolik kodeksining 1120–1133 va 1142-moddalari bilan belgilangan.