Васиятнома бўйича ворислик

Васият эркинлиги

Фуқаро ўзининг барча мол-мулкини ёки унинг муайян қисмини:

қонун бўйича меросхўрларга;
меросхўрлар доирасига кирмайдиган бошқа шахсларга;
юридик шахсларга;
давлатга;
фуқароларнинг ўзини ўзи бошқариш органларига васият қилиши мумкин.

Васият қилувчи бир ёки бир нечта қонуний меросхўрни сабабини кўрсатмасдан меросдан маҳрум қилишга ҳақли.

Васиятнома шахсан тузилади, ёзилган жойи ва вақти кўрсатилиб, ёзма шаклда расмийлаштирилади.

Васиятномани ўзгартириш ва бекор қилиш

Васият қилувчи исталган вақтда:

янги васиятнома тузиш;
васиятномани ўзгартириш;
васиятномани тўлдириш;
уни тўлиқ бекор қилиш ҳуқуқига эга.

Бунинг учун меросхўрларнинг ёки бошқа шахсларнинг розилиги талаб қилинмайди.

Муҳим! Янги васиятнома аввалги васиятномани тўлиқ ёки унга зид бўлган қисмида бекор қилади.

Васиятнома нотариал тасдиқланган ёки қонунда белгиланган ҳолларда нотариал тасдиқланган васиятномага тенглаштирилган бўлиши мумкин.

Меросдан мажбурий улуш

Васият эркинлиги мутлақ эмас. Мерос қолдирувчининг:

вояга етмаган ёки меҳнатга қобилиятсиз болалари;
меҳнатга қобилиятсиз эри ёки хотини;
меҳнатга қобилиятсиз ота-онаси

васиятнома мазмунидан қатъи назар, қонун бўйича уларга тегиши лозим бўлган улушнинг камида ярмини мажбурий улуш сифатида олади.

Васият мажбурияти

Васият қилувчи меросхўр зиммасига бир ёки бир нечта шахс фойдасига муайян мулкий мажбуриятни бажариш вазифасини юклаши мумкин.

Меросхўр бу мажбуриятни ўзига ўтган мероснинг қарзлар чегирилгандан кейинги ҳақиқий қиймати доирасида бажаради.

Эътибор беринг! Васиятнома мавжудлиги мерос қолдирувчининг қарзларини бекор қилмайди. Қарзлар мерос таркибида ҳисобга олинади.

Тартиб Ўзбекистон Республикасининг Фуқаролик кодексининг 1120–1133 ва 1142-моддалари билан белгиланган.