Hukumat qarori (306-son, 12.06.2026 y.) bilan “Ijro etuvchi hokimiyat organlari va davlat korxonalarida autsorsing xizmatlarini tashkil etish tartibi to‘g‘risida”gi nizom tasdiqlandi.

Ushbu Nizom ijro etuvchi hokimiyat organlari hamda davlat korxonalarida funksiyalarni autsorsing shartlari asosida tashkil etish tartibini belgilaydi.

Nizomga ko‘ra, autsorsing xizmati quyidagi shartlar asosida amalga oshiriladi:

▪️ autsorserni aniqlash;
▪️ korrupsiya va manfaatlar to‘qnashuvi holatlariga yo‘l qo‘ymaslik;
▪️ autsorser tomonidan funksiyalarning sifatli bajarilishi;
▪️ davlat buyurtmachisining funksiyalarini bajarish bilan band bo‘lgan xodimlar sonini (shtatini) qisqartirish.

Ishtirokchilarga nisbatan quyidagi talablar qo‘yiladi:

➖ tadbirkor sifatida ro‘yxatdan o‘tgan bo‘lishi;

➖ beriladigan funksiyalar yo‘nalishida kamida 6 oy faoliyat olib borgan bo‘lishi;

➖ autsorsing shartnomasini bajarish uchun yetarli ish tajribasi hamda boshqa resurslarga ega bo‘lishi;

➖ soliq va yig‘imlarni to‘lash bo‘yicha muddati o‘tgan qarzdorligi mavjud bo‘lmasligi;

➖ ishtirokchining sud qarorlari bo‘yicha bajarilmagan majburiyatlari mavjud emasligi.

Autsorsing xizmati ko‘rsatilishi yuzasidan nazorat va monitoring davlat buyurtmachisi tomonidan shartnomada belgilangan shartlarda va muddatlarda amalga oshiriladi.