Ўзбекистонда саноат, электр транспорт ва рақамли инфратузилманинг тез ривожланиши электр энергиясига талабни сезиларли ошириши кутилмоқда. Шу сабабли янги электр станциялари, энергия сақлаш тизимлари ва юқори кучланишли тармоқларни талабдан олдин ривожлантириш режалаштирилмоқда.

22 сентябрь куни Президентга электр энергетикасини ўрта ва узоқ муддатли ривожлантириш режалари тақдим этилди. Расмий ҳисоб-китобларга кўра, иқтисодиёт, аҳоли сони, саноат, электромобиллар ва дата-марказлар кенгайиши энергетика тизимига қўшимча юклама беради.

2030 йилга қадар фақат саноат соҳасининг электр энергияси истеъмоли ҳозирги 38 млрд кВт·соатдан 53,5 млрд кВт·соатгача ўсиши прогноз қилинмоқда.

Шу боис электр ишлаб чиқариш қувватларини талабдан олдин ошириш, тармоқларнинг ўтказувчанлигини кенгайтириш ва етарли захира қувватларини шакллантириш зарурлиги қайд этилди.

Режага кўра, мамлакатдаги электр генерация қуввати 2030 йилга бориб 46,1 ГВтга етказилади. Бу йилига қарийб 129 млрд кВт·соат электр ишлаб чиқариш имконини бериши кутилмоқда.

2035 йилда эса генерация қувватини 57,2 ГВт, йиллик ишлаб чиқариш ҳажмини 154,7 млрд кВт·соатга етказиш кўзда тутилган.

Ҳозирнинг ўзида қуёш ва шамол электр станцияларининг умумий қуввати 6,3 ГВтдан ошган, гидроэлектр станциялар қуввати эса 2,5 ГВтга яқинлашган.

Энергетика тизимининг барқарорлигини ошириш учун электр энергиясини сақлаш тизимлари ҳам кенгайтирилади. Ҳозир умумий қуввати 4,2 ГВт бўлган 26 та лойиҳа шакллантирилган бўлиб, улардан 17 таси амалга ошириш босқичида.

Шунингдек, 2030 йилгача 9 та 220 кВ ва 7 та 500 кВ подстанция, қарийб 5 минг км янги электр узатиш тармоқлари қурилиши режалаштирилган.

Муҳим: расмий ахборотда электромобиллар электр тизими учун муаммо ёки чеклов сифатида кўрсатилмаган. Улар саноат ва дата-марказлар қатори келгусида электрга талабни оширадиган омиллардан бири сифатида қайд этилган. Шу сабабли энергетика инфратузилмасини олдиндан кенгайтириш режалаштирилмоқда.