1 майдан бошлаб Тошкент — Хива йўналиши бўйича Hyundai Rotem тезюрар поездини ишга тушириш режа қилинмоқда. Биринчи таркиб аллақачон мамлакатга олиб келинган, йил давомида яна бештаси келтирилади, дея маълум қилди транспорт вазири Илҳом Маҳкамов. Истиқболда йўналишни Нукусгача узайтириш кўзланган.

Тошкент — Хива йўналишидаги Hyundai Rotem тезюрар поездини 1 майдан бошлаб ишга тушириш режа қилинмоқда. 18 март куни президент Шавкат Мирзиёев Самарқанд вилоятининг Нарпай туманига ташрифи чоғида янги таркибни синовдан ўтказди.

Транспорт вазири Илҳом Маҳкамовнинг «Ўзбекистон 24» телеканалига берган интервьюсида маълум қилишича, мамлакат бундай поезддан олтита харид қилган.

Унинг сўзларига кўра, ҳаракатнинг йўлга қўйилиши инфратузилмани модернизация қилиш туфайли амалга оширилди.

«Муҳтарам президентимиз ташаббуслари билан, энг аввало, Хивагача бўлган темир йўл тармоғини электрлаштириш ва уни юқори тезликдаги поездлар ҳаракатига мослаштириш ишлари якунланди. Натижада 1 майдан бошлаб Тошкент — Хива йўналишида поездлар қатновини йўлга қўямиз», — деб таъкидлади вазир.

Йил якунига қадар яна бешта поезд олиб келиниши кутилмоқда.

«Олтита поезднинг барчаси Хивагача қатнайди. Президент топшириғига биноан, Нукусгача бўлган йўлни электрлаштириш ишлари ҳам олиб борилмоқда, шундан сўнг Нукус йўналишида ҳам поездлар ҳаракатини йўлга қўямиз», — дея қўшимча қилди Илҳом Маҳкамов.

Поезд ташқи кўриниши оқ рангда бўлиб, ойналари қорайтирилган ҳамда Ўзбекистон байроғига ишора қилувчи мовий, яшил ва қизил чизиқлар билан безатилган.

Саркарда Жалолиддин Мангуберди номи берилган ушбу поезд етказиб берилиши керак бўлган олтита поезддан биринчиси бўлди. У 7 та вагондан иборат бўлиб, тахминан 390 нафар йўловчига мўлжалланган ва соатига 260 км тезликкача чиқа олади. Йўловчилар учун хизмат кўрсатишнинг учта тоифаси — VIP, бизнес ва эконом класси мавжуд бўлади.

Таъкидланишича, узунлиги 175 метр бўлган ушбу поезд мамлакат иқлимига мослаштирилган бўлиб, у чанг-тўзонга, ҳароратнинг кескин ўзгаришига ва қум бўронларига чидамли ҳисобланади. Яқин орада уни Тошкент — Урганч — Хива йўналишида ишга тушириш режалаштирилган бўлиб, бунда йўл вақти ҳозирги 13 соатдан тахминан 7 соатгача қисқаради.

Юқори тезликдаги Hyundai Rotem электропоездларини етказиб бериш бўйича шартнома 2024 йил июнь ойида Жанубий Корея президентининг Ўзбекистонга ташрифи чоғида имзоланган эди.

Лойиҳанинг умумий қиймати 220,03 млн еврога баҳоланмоқда. Ўзбекистон 21,3 млн евро, «Ўзбекистон темир йўллари» компанияси 13,5 млн евро, Корея Эксимбанки эса 10 йиллик имтиёзли давр билан 40 йил муддатга 185,18 млн евро эквивалентида Корея вонида кредит ажратади.

Янги поезд учун узунлиги 465 км бўлган «Бухоро-Урганч-Хива» йўналиши электрлаштирилди.

Яқин йилларда 196 километрлик «Мискин — Нукус» темир йўл тармоғи электрлаштирилади. Бунинг натижасида Тошкентдан Нукусгача бўлган йўл вақти 16 соатдан 7 соатгача қисқаради.