Ўзбекистонда кино соҳасидаги Республика кинематография комиссияси, Миллий ва Бадиий кенгашлар фаолияти тугатилади. Президент улар эскича бошқарув ва самарасиз назорат тизимидан воз кеча олмаганини қайд этди. Энди ўша соҳа мутахассисларидан иборат ҳақ тўланадиган эксперт гуруҳлари ташкил қилинади.

Ўзбекистонда Республика кинематография комиссияси, Миллий ва Бадиий кенгашлар фаолияти бутунлай тугатилади. Бу ҳақда президент маданият ва санъат соҳаси ходимлари билан учрашувда маълум қилди.

Йиғилишда Республика кинематография комиссияси, Миллий ва Бадиий кенгашлар ҳалигача эскича бошқарув ва самарасиз назорат тизимидан воз кеча олмаётгани қайд этилди. Шу боис, соҳада ижодий эркинлик ва соғлом рақобат муҳитини ривожлантириш мақсадида ушбу комиссия ва кенгашлар фаолияти бутунлай тугатилади.

Энди кинонинг ҳар бир жанри ва мавзусидан келиб чиқиб, ўша соҳа мутахассисларидан иборат ҳақ тўланадиган эксперт гуруҳлари ташкил қилинади.

Бунда Ўзбекистон киноарбоблари ижодий уюшмаси, Ёзувчилар уюшмаси, Бастакорлар уюшмаси томонидан тавсия этилган мутахассислар эксперт гуруҳлари таркибига киритилади. Мутасаддиларга кино соҳасида замонавий ва шаффоф тизимни йўлга қўйиш бўйича таклиф киритиш топширилди.

Шунингдек, шу йилнинг 1 сентябридан давлат буюртмаси асосида кино яратишда тарғибот ва реклама харажати учун фильм бюджетининг 30 фоизигача маблағ ажратилади, харид шартномаларини экспертизадан ўтказиш талаби бекор қилинади. Шунингдек, хорижий компанияларнинг Ўзбекистон ҳудудида кино маҳсулот яратиш билан боғлиқ фаолияти солиқлардан озод қилинади.

Давлат буюртмаси асосида яратилган фильмлар намойишидан тушган маблағнинг 50 фоизи продюсер ва ижодий гуруҳга қўшимча рағбат сифатида берилади.

Ўзбекистон киноарбоблари ижодий уюшмаси томонидан ўтказиладиган «Олтин ҳумо» миллий кино тақдимотининг нуфузини янги босқичга кўтариш мақсадида ҳар йили 5 миллиард сўмдан ажратилади.

Яқинда бухоролик ёш кино ижодкорлар Сухроб Қодиров ва Дилшод Усмоновнинг «Қадам. Қуёш боласи Юсуф» номли қисқа метражли филми Франциянинг Канн шаҳридаги инклюзив фильмлар халқаро фестивалида Гран-при соҳиби бўлди. Уларга ижодини давом эттириш учун 1 миллиард сўм миқдорида ваучер берилади.

«Бизга ҳар йили халқаро фестиваллар даражасида эътироф этиладиган турли мавзулардаги камида 5−10 та сифатли фильмлар керак. Бугун халқимиз сизлардан ҳаётий кинофильмлар, сериаллар ва оммабоп ҳужжатли асарларни кутяпти», — деди президент.

«Ўзбекфилм»га миллий мақом берилиб, маҳаллий ва халқаро киноиндустрияга хизмат кўрсатадиган марказий киноконсернга айлантирилади. Миллий фильмларимизни халқаро бозорларга олиб чиқиш мақсадида глобал кино платформалари билан ҳамкорлик кучайтирилади.