Металл корпус ичида 32 гигабайтли хотира ва беш метргача бўлган масофадан овозни танийдиган микрофон яширинган.

Фловтиса компанияси ташқи кўринишидан оддий ручкадан фарқ қилмайдиган, ичи эса нейротармоққа уланган мини-диктофон каби тузилган гаджетни тақдим этди.

Ссрибе деб ном олган ушбу қурилманинг асосий хусусияти — одатий қўлда ёзиш жараёнини атрофдаги товушларни фонда ёзиб олиш билан бирлаштирганидир.

Корпуси металлдан ясалган, 0,5 ва 0,7 мм ли стерженлари бор, сиёҳини эса исталган оддий ёзув анжомига ўхшаб тўлдириш мумкин. Техниканинг ҳеч қандай ташқи аломатлари кўринмайди: на симлар, на дисплейлар, на бошқарув тугмалари.

Овозни қабул қилиш учун 5 метргача масофадаги нутқни илғай оладиган кичик ўлчамли МEМС-микрофон жавобгар.

Барча аудиофайллар тўғридан-тўғри 32 гигабайтлик ички хотирага сақланади, шу боис суҳбат вақтида интернетга уланиш шарт эмас.

Қурилма қуввати 30 соатлик ишга етади, агар қувватлаш учун махсус ғилоф харид қилинса, бу кўрсаткич электр манбаисиз 100 соатгача узаяди.

Овознинг ўзи бевосита қурилмада эмас, балки мобил иловада қайта ишланади. Смартфон билан синхронлаштирилгач, аудиоёзувлар матнли шаклга ўгирилади ва учрашув якунлари бўйича қисқа хулосаларга айлантирилади. Илова 39 та тилни қўллаб-қувватлайди ҳамда иОС ва Андроид тизимларида ишлайди.

Корпусдаги ФловМарк тугмаси алоҳида функцияга эга. Суҳбат пайтида уни боссангиз, суҳбатнинг маълум бир жойига белги қўйилади. Бу эса кейинчалик бутун ёзувни эшитиб ўтирмасдан, умумий стенограммадан муҳим қарор ёки топшириқни тезда топиш имконини беради.

Илова аудиодан ташқари, қўлёзма саҳифалар, тақдимот слайдлари ва ёзувлар билан тўлдирилган доскалар суратларини ҳам қабул қила олади. Буларнинг барчаси тегишли суҳбатга бириктирилиб, унинг матнли шакли билан бирга сақланади.

Қурилма ҳозирда икки хил рангда — тўқ кулранг ва кумушранг-кулранг тусда сотилмоқда. Бошланғич тўплам $159 бўлиб, унга аксессуарнинг ўзи, зарядлаш кабели ва йигирмата сиёҳли ўзак киради. $209 лик кенгайтирилган тўплам эса зарядлаш ғилофи ва уч ойлик премиум тариф обунаси билан тўлдирилган.

Обуна сунъий интеллект ёрдамида қайта ишланадиган суҳбатлар ҳажмини белгилаб беради. Қурилма эгаларига ойига 300 дақиқа бепул тақдим этилади. $14,90 лик тариф чекловни 1200 дақиқагача оширса, чексиз тариф ҳар ой учун $29,90 га тушади.