Пойтахтда янги объектларни қуришда муҳандислик тармоқлари, ижтимоий инфратузилма ва экологик ҳолатга тушадиган юкламани ҳисобга олишга қаратилган янги ёндашув муҳокама қилинди.

15 сентябрь куни Президент Администрацияси раҳбари Саида Мирзиёева йирик архитектура лойиҳалари ташаббускорлари, мустақил мутахассислар, урбанистлар, шунингдек, соҳадаги етакчи студия ва олий таълим муассасалари вакиллари билан учрашди.

Учрашувда Тошкентда тартибсиз қурилишларнинг олдини олиш, янги объектларни шаҳар муҳити ва мавжуд коммуникацияларга ортиқча зарар етказмаган ҳолда барпо этиш имконини берувчи тизимни шакллантириш масалалари муҳокама қилинди.

Янги қурилиш шаҳарни ривожлантириши керак, унинг инфратузилмасига қўшимча номутаносиблик ва ортиқча юклама келтириб чиқармаслиги лозим.

Қайд этилишича, пойтахтнинг тез суръатларда ўсиши натижасида янги қурилишларни режалаштиришда фақат бинонинг ўзи эмас, балки унинг атрофдаги электр энергияси, сув таъминоти, муҳандислик тармоқлари ва ижтимоий объектларга таъсири ҳам ҳисобга олиниши керак.

Шу билан бирга, фақат келгусидаги қурилишларни тартибга солиш эмас, балки ижтимоий соҳа ва муҳандислик тармоқларида ҳозирдан мавжуд бўлган ортиқча юклама билан боғлиқ муаммоларни бартараф этиш ҳам муҳим вазифа сифатида кўрсатилди.

Саида Мирзиёева Тошкентни янада обод, тоза ва хавфсиз қилишга қаратилган лойиҳаларни амалга ошириш истагида бўлган тадбиркорларни қўллаб-қувватлаш зарурлигини ҳам таъкидлади.

Муҳим: ҳозирча мазкур тизимнинг аниқ механизми, қурилиш лойиҳалари учун янги мезонлар ёки уларни жорий этиш санаси эълон қилинмаган. Гап янги ёндашувни ишлаб чиқиш ва жорий этиш масаласи ҳақида кетмоқда.