Компанияга ном танлашда унинг чиройли эшитилиши етарли эмас. Ном бошқа фирма ёки товар белгиси билан адаштириб юбориш даражасида ўхшаш бўлмаслиги, қонунчилик талабларига мос келиши ҳамда келгусида бренд сифатида ҳимоя қилиниши муҳим.

Янги бизнес ташкил этаётганда фирма номини давлат рўйхатидан ўтказишдан олдин уни бир нечта манба орқали текшириш тавсия этилади. Хусусан, фирма номлари Birdarcha, мавжуд юридик шахслар ҳақидаги маълумотлар эса my.gov.uz орқали текширилиши мумкин. My.gov.uz’да юридик шахсларнинг рўйхат маълумотлари билан танишиш хизмати бепул ва автоматик тарзда кўрсатилади.

Қонунчиликка кўра, фирма номи бошқа юридик шахснинг аввал рўйхатдан ўтган номи билан адаштириб юбориш даражасида бир хил ёки ўхшаш бўлиши мумкин эмас. Шунингдек, тегишли рухсатсиз давлатнинг расмий номи, халқаро ташкилотлар номлари, машҳур шахслар исмлари ҳамда истеъмолчини чалғитиши мумкин бўлган белгилардан фойдаланишга чекловлар мавжуд.

Фирма номи ва товар белгиси бир хил тушунча эмас. Фирма номи — юридик шахснинг расмий номи. Брендни бозорда кучлироқ ҳуқуқий ҳимоя қилиш учун эса уни алоҳида товар белгиси сифатида рўйхатдан ўтказиш мақсадга мувофиқ.

Шунинг учун ном танлашда фирма номи билан бирга товар белгиси, .uz домени ва ижтимоий тармоқлардаги шу номнинг мавжудлигини ҳам текшириш фойдали.

Фирма номини олдиндан банд қилиш имконияти ҳам мавжуд. Spot маълумотига кўра, бундай банд қилиш 60 кунгача амал қилади ва йиғим БҲМнинг 50 фоизини ташкил этади. Амалдаги БҲМ 2026 йил 1 сентябрдан 440 минг сўм, яъни 50 фоизи 220 минг сўмга тенг.

Ҳуқуқий асослар

“Фирма номлари тўғрисида”ги Қонун ҳамда Вазирлар Маҳкамасининг 2017 йил 9 февралдаги 66-сон қарори.