Юк ташувчиларни ягона реестрга киритиш, электрон йўл варақаси ва буюртмаларни қабул қилувчи агрегатор хизматини жорий этиш режалаштирилмоқда. Тизим юк ҳаракатини реал вақтда кузатиш ва соҳадаги норасмий хизматларни қисқартиришга ҳам хизмат қилиши кутилмоқда.

21 сентябрь куни Президент Шавкат Мирзиёев транспорт-логистика соҳасидаги йирик лойиҳаларнинг бориши бўйича тақдимот билан танишди. Унда инфратузилмани ривожлантириш билан бирга юк ташиш жараёнларини рақамлаштириш масаласига алоҳида эътибор қаратилди.

Тақдимотда юк ташиш соҳасида кузатилмайдиган иқтисодиёт улуши 42 фоиздан юқори экани қайд этилди. Муаммолардан бири сифатида маҳаллий юк ташувчиларнинг ягона реестри, электрон буюртмалар ва транспорт хизматларини бирлаштирувчи умумий электрон тизим мавжуд эмаслиги кўрсатилди.

Шу сабабли ягона рақамли транспорт тизимини яратиш, ташувчилар реестрини шакллантириш, электрон йўл варақаси ва буюртмаларни қабул қилувчи агрегатор хизматини жорий этиш таклиф қилинди.

Шунингдек, халқаро ташувларда электрон рухсатномалар алмашинувини кенгайтириш ва юкларнинг ҳаракатини реал вақт режимида кузатиш имкониятларини йўлга қўйиш режалаштирилмоқда.

Янги механизмлар орқали ташувчилар учун қулайлик яратиш, норасмий хизматларни қонуний фаолиятга ўтказиш ва транспорт соҳасидаги шаффофликни ошириш кўзда тутилган.

Транспорт-логистика инфратузилмасини кенгайтириш доирасида Тошкент шаҳри, Тошкент, Андижон, Сурхондарё ва Бухоро вилоятларида жами 17 та логистика маркази ва терминал лойиҳасини амалга ошириш ҳам назарда тутилмоқда.

2030 йилгача мамлакатда транспорт хизматлари ҳажмини 2 бараварга ошириш, соҳага 9,1 млрд доллар инвестиция жалб қилиш ва хизматлар экспортини 5,7 млрд долларга етказиш режалаштирилган.

Муҳим: ягона рақамли транспорт тизими ҳозирча амал қилаётган тайёр платформа эмас. У 21 сентябрь куни Президентга тақдим этилган таклифлар қаторида муҳокама қилинган.