Yarashilganlik sababli jinoyat ishini tugatish

Ishni sudda ko‘rib chiqish

Yarashuvga oid jinoyat ishi sudga kelib tushganidan keyin 10 sutkadan kechiktirmay ko‘rib chiqiladi.

Sud majlisida:

gumon qilinuvchi, ayblanuvchi yoki sudlanuvchi;
jabrlanuvchi yoki fuqaroviy da’vogar;
ularning qonuniy vakillari;
himoyachi;
prokuror ishtirok etadi.

Muhokama jabrlanuvchining yarashuv haqidagi arizasini o‘qib eshittirishdan boshlanadi.

Sud tekshiradigan holatlar

Sud:

yarashuvning ixtiyoriyligi va sabablarini;
shaxs o‘z aybiga ixtiyoriy iqror bo‘lganini;
u qilmishining oqibatlarini anglaganini;
etkazilgan zararni bartaraf etganini;
taraflarga tazyiq yoki majburlash bo‘lmaganini;
gumon qilinuvchi, ayblanuvchi, sudlanuvchi va qonuniy vakillarning roziligini tekshiradi.

Har uchala asosiy shart — aybga iqror bo‘lish, jabrlanuvchi bilan yarashish va zararni bartaraf etish bir vaqtda mavjud bo‘lishi kerak.

Ish tugatilmaydigan holatlar

Agar sud:

yarashuv yoki aybga iqror bo‘lish ixtiyoriy emasligini;
zararni qoplashdan bosh tortilayotganini;
qilmishda og‘irroq jinoyat belgilari mavjudligini aniqlasa, ishni umumiy tartibda surishtiruv yoki dastlabki tergov olib borish uchun prokurorga yuboradi.

Shuningdek, jinoyat Jinoyat kodeksining 66¹-moddasida ko‘rsatilmagan bo‘lsa yoki shaxsga nisbatan qonundagi cheklov mavjud bo‘lsa, yarashuv qo‘llanilmaydi.

Muhim: Jabrlanuvchining «da’vom yo‘q» degan arizasining o‘zi ishni tugatish uchun etarli emas. Sud yarashuvning qonuniyligi, ixtiyoriyligi va zarar haqiqatda bartaraf etilganini tekshiradi.

Sud ajrimi

Sud muhokamasi natijasida ajrim chiqaradi. Unda:

ishni yarashuv sababli tugatish yoki prokurorga yuborish;
ehtiyot chorasini bekor qilish, o‘zgartirish yoki saqlab qolish;
ashyoviy, yozma va raqamli dalillarning taqdiri;
zararni qoplash bilan bog‘liq masalalar hal etiladi.

Ish yarashuv asosida tugatilsa, ayblov hukmi chiqarilmaydi va shaxs mazkur ish bo‘yicha sudlanmagan hisoblanadi. Biroq bu reabilitatsiya qilish asosi emas.

Ajrim ustidan shikoyat qilish

Sud ajrimi ustidan gumon qilinuvchi, ayblanuvchi, sudlanuvchi, jabrlanuvchi, fuqaroviy da’vogar, ularning qonuniy vakillari hamda himoyachi xususiy shikoyat berishi, prokuror esa xususiy protest keltirishi mumkin.

Tartib Jinoyat kodeksining 66¹-moddasi va Jinoyat-protsessual kodeksining 582–586-moddalari bilan belgilanadi.

Maqola foydali bo‘ldimi?

Bo‘limlar