Geodeziya va kartografiya faoliyati to‘g‘risida

Geodeziya va kartografiya faoliyati

Geodeziya va kartografiya faoliyati Erning shakli, tashqi gravitatsiya maydoni, er sathidagi nuqtalar koordinatalari va ularning o‘zgarishlarini aniqlash, geodeziya tarmoqlarini yaratish hamda xaritalar, rejalar va geofazoviy ma’lumotlarni tayyorlashga qaratilgan faoliyatdir.

Uning ob’ektlari:

O‘zbekiston Respublikasining hududi;
Er shari hududi;
kosmik fazo;
tabiiy va sun’iy osmon jismlari bo‘lishi mumkin.

Vakolatli davlat organi

Geodeziya va kartografiya faoliyati sohasidagi maxsus vakolatli davlat organi — Kadastr agentligi.

U sohada davlat siyosatini amalga oshiradi, geodeziya va kartografiya ishlarini muvofiqlashtiradi, davlat hisobini, kartografiya-geodeziya fondini va davlat geodeziya nazoratini yuritadi.

Ishlarning turlari

Geodeziya va kartografiya ishlari:

umumdavlat ahamiyatiga molik ishlar;
maxsus (tarmoqqa oid) ahamiyatga molik ishlarga bo‘linadi.

Umumdavlat ahamiyatiga molik ishlar davlat geodeziya tarmoqlari, topografik xaritalar, davlat chegarasini delimitatsiya va demarkatsiya qilish, davlat kadastrlari hamda boshqa umummilliy vazifalar bilan bog‘liq bo‘ladi.

Faoliyatni amalga oshirish

Geodeziya va kartografiya faoliyati yuridik shaxslar tomonidan amalga oshiriladi. Faoliyatni boshlashdan oldin Kadastr agentligi belgilangan tartibda xabardor qilinishi kerak.

Xabardor qilish geodeziya yoki kartografiya ishlarini ro‘yxatga olish talabini avtomatik ravishda bekor qilmaydi. Qonunchilikda nazarda tutilgan ishlar alohida ro‘yxatdan o‘tkazilishi lozim.

Ishlarni ro‘yxatga olish

Umumdavlat va maxsus ahamiyatga molik ishlar ro‘yxatga olinadi. Ayrim tarmoq ishlari Vazirlar Mahkamasi belgilagan ro‘yxat asosida ro‘yxatga olinmasdan bajarilishi mumkin.

Ro‘yxatga olish to‘g‘risidagi qaror:

faoliyatini xabardor qilish tartibida amalga oshiradigan yuridik shaxsga beriladi;
cheklanmagan muddatga amal qiladi;
tegishli elektron reestrga kiritiladi.

Arizani ko‘rib chiqish jarayoni texnik loyiha yoki dasturning ekspertizasini ham qamrab oladi.

Materiallarni ekspertizadan o‘tkazish

Davlat byudjeti mablag‘lari hisobidan bajarilgan umumdavlat ahamiyatiga molik ishlar natijasida olingan materiallar ekspertizadan o‘tkaziladi.

Ekspertizada materiallarning:

texnik jihatdan tartibga solish hujjatlariga;
standartlarga;
texnik loyiha va dastur talablariga muvofiqligi tekshiriladi.

Geodeziya punktlarini muhofaza qilish

Geodeziya punktlari joylashgan er uchastkalari, binolar yoki inshootlarning huquq egalari:

punktlarning but saqlanishini ta’minlashi;
muhofaza zonasi rejimiga rioya qilishi;
punkt shikastlangan yoki yo‘q qilingan holda vakolatli organni xabardor qilishi;
ish bajaruvchilarga punktlarga kirish imkonini berishi shart.

Geodeziya punktiga shikast etkazgan yoki uni yo‘q qilgan shaxs tiklash va qayta qurish xarajatlarini qoplaydi.