“Tabiat himoyachisi” ko‘krak nishoni

O‘zbekiston Milliy axborot agentligi - rasmiy xabarlar, tezkor yangiliklar, tahliliy-tanqidiy materiallar, qonun hujjatlari, foto va videoreportajlar

Kimlar ko‘krak nishoni bilan taqdirlanishi mumkin?

«Tabiat himoyachisi» ko‘krak nishoni ekologiya va atrof-muhitni muhofaza qilish, tabiiy resurslardan oqilona foydalanish va tabiatni asrash sohasida salmoqli natijalarga erishgan shaxslarni rag‘batlantirish uchun ta’sis etilgan.

Ko‘krak nishoni bilan O‘zbekiston fuqarolari, shuningdek O‘zbekiston fuqarosi bo‘lmagan shaxslar ham belgilangan tartibda taqdirlanishi mumkin.

Nomzodni kim va qachon taqdim etadi?

Nomzodlar:

vazirlik va idoralar;
mahalliy ijro etuvchi hokimiyat organlari;
nodavlat notijorat tashkilotlari tomonidan har yili 1-mayga qadar taqdim etiladi.

Ekologiya sohasidagi amaldagi vakolatli organ — O‘zbekiston Respublikasi Ekologiya va iqlim o‘zgarishi milliy qo‘mitasi. Qo‘mita 2025-yildagi qayta tashkil etish natijasida tegishli huquq va majburiyatlar bo‘yicha huquqiy voris sifatida belgilangan.

Nomzod bo‘yicha qanday hujjatlar taqdim etiladi?

Nomzod uchun:

ma’lumotnoma-ob’ektivka;
shaxsni tasdiqlovchi hujjat nusxasi;
uning so‘nggi 3 yil davomida ekologiya va atrof-muhitni muhofaza qilish sohasidagi faoliyati hamda erishgan natijalarini tavsiflovchi ma’lumot taqdim etiladi.

Nomzodlar qanday baholanadi?

Nomzodlarni ko‘rib chiqish uchun 5 nafardan iborat komissiya tuziladi. Komissiya taqdim etilgan hujjatlar va nomzodning sohadagi natijalarini o‘rganib, har yili 15-mayga qadar yakuniy xulosa qabul qiladi.

Taqdirlash to‘g‘risidagi buyruq 1-iyunga qadar qabul qilinadi. Ko‘krak nishoni, qoida tariqasida, 5-iyunь — Butunjahon atrof-muhit kuni arafasida yoki shu munosabat bilan tantanali ravishda topshiriladi.

Alohida hollarda belgilangan muddatlardan tashqari ham ko‘krak nishoni bilan taqdirlash mumkin.

Ko‘krak nishoni bilan birga pul mukofoti beriladimi?

Ha. Ko‘krak nishoni bilan taqdirlangan shaxsga 4 BHM miqdorida bir martalik pul mukofoti beriladi.

Bir shaxs «Tabiat himoyachisi» ko‘krak nishoni bilan bir marta taqdirlanadi.

2026-yilda kimlar uchun yangi mexanizmlar belgilandi?

«Yashil tadbirkor» maqomini olish bo‘yicha tanlov doirasida belgilangan yuqori natijalarga erishgan tadbirkorlik sub’ektlarining 10 nafar vakili «Tabiat himoyachisi» ko‘krak nishoni bilan taqdirlash uchun tavsiya etiladi.

Shuningdek, 2026-yilgi Davlat dasturida elektromobilda taksi xizmatini ko‘rsatuvchi o‘zini o‘zi band qilgan fuqarolar uchun alohida rag‘batlantirish mexanizmi belgilangan. Taksi xizmatini 1 million kilometr davomida qoidabuzarlik va yo‘l-transport hodisasisiz amalga oshirgan fuqarolarni «Tabiat himoyachisi» ko‘krak nishoni bilan taqdirlash amaliyotini yo‘lga qo‘yish nazarda tutilgan.

Eslatma: «Yashil tadbirkor» bo‘yicha belgilangan mezonga erishish nomzodni ko‘krak nishoniga tavsiya etish uchun asos bo‘ladi. Yakuniy taqdirlash belgilangan rasmiy tartibda amalga oshiriladi.