Ijod maktablariga o‘quvchilarni qabul qilish

Ijod maktablariga qaysi sinfdan qabul qilinadi?

Ijod maktablariga o‘quvchilar 7-sinfga qabul qilinadi. Qabul ijodiy imtihonlar va test sinovlari natijasi bo‘yicha amalga oshiriladi.

Har bir sinfdagi o‘quvchilar soni 20 nafardan oshmasligi kerak. Belgilangan qabul kvotasi doirasida eng yuqori ball to‘plagan talabgorlar o‘qishga qabul qilinadi.

Ijod maktabi — o‘quvchilarning adabiyot, til, san’at va ijodiy tafakkur sohasidagi qobiliyatini rivojlantirishga ixtisoslashtirilgan davlat ta’lim muassasasi.

Hujjatlar qanday topshiriladi?

Hujjatlar Ixtisoslashtirilgan ta’lim muassasalari agentligining rasmiy veb-sayti orqali onlayn shaklda qabul qilinadi.

Quyidagi ma’lumotlar taqdim etiladi:

o‘quvchining baholar tabeli tasdiqlangan nusxasi;
oxirgi ikki oyda tushgan fotosurati;
tug‘ilganlik haqidagi guvohnoma ma’lumotlari;
ota-ona yoki qonuniy vakilning pasport ma’lumotlari;
bog‘lanish uchun telefon raqami.

Qabul muddatlari va kvotalar hujjat qabul qilish boshlanishidan kamida 10 kalendarь kun oldin rasmiy saytlar va ijtimoiy tarmoqlarda e’lon qilinadi. O‘quvchi hujjatni faqat bitta ijod maktabiga topshirishi mumkin.

Kirish imtihonlari qanday o‘tkaziladi?

Kirish imtihonlari uch bosqichdan iborat:

ijodiy matn yaratish;
ijodiy suhbat;
ona tili va adabiyot, ingliz tili hamda intellektual qobiliyat bo‘yicha test sinovlari.

Uchinchi bosqichda jami 50 ta topshiriq beriladi: ona tili va adabiyotdan 20 ta, ingliz tilidan 15 ta va intellektual qobiliyatdan 15 ta. Ishoqxon Ibrat nomidagi ijod maktabi uchun alohida fanlar tarkibi belgilangan.

Kimlar imtihonsiz qabul qilinadi?

Agentlik tomonidan 6-sinf o‘quvchilari o‘rtasida badiiy adabiyot va san’at sohasida o‘tkaziladigan tanlovning viloyat bosqichida 1, 2 yoki 3-o‘rinni egallagan o‘quvchilar umumiy qabul parametrlari doirasida ijod maktabiga kirish imtihonisiz qabul qilinadi.

Natijalar qachon e’lon qilinadi?

Yakuniy natijalar test sinovlari o‘tkazilgan kundan keyin 20 kun ichida Agentlik va ijod maktablarining rasmiy veb-saytlarida e’lon qilinadi.

Natijadan norozi o‘quvchi natija e’lon qilingan vaqtdan boshlab 3 ish kuni ichida apellyatsiya berishi mumkin. Apellyatsiya komissiyasi murojaatni 10 kun ichida ko‘rib chiqadi.

Apellyatsiya — kirish imtihoni natijasini belgilangan tartibda qayta ko‘rib chiqishni so‘rab berilgan murojaat.

Ta’lim jarayoni qanday tashkil etiladi?

Ijod maktablarida o‘quv haftasi, qoida tariqasida, 5 kun davom etadi. Pedagogik kengash qarori bilan 6 kunlik o‘quv haftasiga o‘tilishi mumkin.

Umumta’lim fanlari bilan bir qatorda ijodiy qobiliyat, adabiy tahlil, til, tarjima, san’at va kasbiy ko‘nikmalarni rivojlantirishga qaratilgan mashg‘ulotlar tashkil etiladi.

Normativ hujjatlar

Maqola foydali bo‘ldimi?

Bo‘limlar