“JEK” nima va ko‘p kvartirali uyni kim boshqaradi?

Uy-joy shirkat xo‘jaliklari vazifasi nimalardan iborat? — Mahalla

«JEK» atamasining huquqiy mazmuni

«JEK» — aholi o‘rtasida ko‘p kvartirali uyga xizmat ko‘rsatuvchi tashkilotga nisbatan qo‘llanadigan odatiy atama. Amaldagi qonunchilikda esa «ko‘p kvartirali uyni boshqarish organi», «boshqaruvchi tashkilot», «boshqaruvchi» va «uy-joy mulkdorlarining shirkati» tushunchalari qo‘llaniladi.

Shu sababli tashkilotning peshlavhasida «JEK» deb yozilganining o‘zi uning qonuniy vakolatini tasdiqlamaydi. Uning nomi, tashkiliy shakli, rahbari, malaka sertifikati va qaysi uylarni boshqarishi haqidagi ma’lumotlar ko‘p kvartirali uylarni boshqarish organlarining elektron reestrida bo‘lishi kerak.

Ko‘p kvartirali uyni boshqarish usullari

Uyni boshqarish usuli joylar mulkdorlarining umumiy yig‘ilishida belgilanadi. Ko‘p kvartirali uy:

joylar mulkdorlari tomonidan bevosita;
yuridik shaxs bo‘lgan boshqaruvchi tashkilot orqali;
yakka tartibdagi tadbirkor sifatida ro‘yxatdan o‘tgan boshqaruvchi orqali;
uy-joy mulkdorlarining shirkati tomonidan boshqarilishi mumkin.

Boshqaruvchi tashkilot yoki boshqaruvchi tanlanganda u bilan har bir mulkdor o‘rtasida umumiy yig‘ilish belgilagan shartlar asosida yozma boshqarish shartnomasi tuziladi.

Uyni boshqarish usuli umumiy yig‘ilish qarori bilan istalgan vaqtda o‘zgartirilishi mumkin. Qabul qilingan qaror mazkur uydagi barcha turar va noturar joylar mulkdorlari uchun majburiydir.

Boshqarish organining asosiy vazifasi

Boshqarish organi:

umumiy mol-mulkni saqlashi va ta’mirlashi;
kirish yo‘laklari, zinapoyalar va lift xonalarini saqlashi;
umumiy muhandislik tarmoqlarining sozligini ta’minlashi;
avariya-dispetcherlik xizmatini tashkil qilishi;
uyga tutash hududni obodonlashtirishi;
bajarilgan ishlar va ularning qiymati haqida mulkdorlarga axborot berishi kerak.

Boshqaruvchi tashkilot shtatida tegishli malaka sertifikatiga ega kamida ikki nafar mutaxassis bo‘lishi lozim. Yakka tartibda faoliyat yurituvchi boshqaruvchi ham malaka sertifikatiga ega bo‘lishi shart.

Muhim: boshqarish organi kvartira ichidagi mulkdorga tegishli jihozlarni bepul ta’mirlashga majbur emas. Uning asosiy javobgarligi ko‘p kvartirali uyning umumiy mol-mulkiga taalluqli.

Tartib «Ko‘p kvartirali uylarni boshqarish to‘g‘risida»gi Qonun, Ko‘p kvartirali uylarni saqlash va ulardan foydalanish qoidalari hamda Vazirlar Mahkamasining 2024-yil 18-dekabrdagi 853-son qarori bilan belgilangan.

Maqola foydali bo‘ldimi?

Bo‘limlar