Bagajni tashish shartlari

Bagaj sifatida qabul qilinadigan buyumlar

O‘lchami, o‘rami va xususiyatlari bo‘yicha:

belgilangan ko‘zdan kechirish tartibotidan o‘tadigan;
bagaj vagoniga qiyinchiliksiz yuklanadigan;
boshqa yo‘lovchilarning bagajiga zarar etkazmaydigan buyumlar bagaj sifatida qabul qilinadi.

Bagaj faqat uni qabul qilish va berish operatsiyalari amalga oshiriladigan stantsiyagacha tashiladi.

Muhim: bagajni poezd jo‘nashidan oldin topshirish mumkin, ammo u poezd jo‘nashidan kamida 2 soat oldin rasmiylashtirilishi kerak. Oldindan topshirilgan bagajni saqlash uchun belgilangan tarif bo‘yicha haq undiriladi.

Vazn va o‘lcham cheklovlari

Bagaj sifatida:

bir joyining vazni 80 kilogrammdan ortiq;
uzunligi 3 metrdan ortiq bo‘lgan buyumlar, qoida tariqasida, qabul qilinmaydi.

Vazni 80 kilogrammdan ortiq bo‘lgan bo‘linmaydigan buyumlar, masalan, muzlatgich yoki gaz plitasi yo‘lovchi chiptasi bo‘yicha har bir rasmiylashtirilgan joyga bittadan qabul qilinishi mumkin. Bundan ortiq buyumlar yuk bagaj tarifi bo‘yicha tashiladi.

Velosiped, aravacha, bolalar karavoti va protez aravachalari o‘ralgan yoki o‘ralmagan holda qabul qilinishi mumkin.

Qadoqlash talablari

Bagajning tarasi va o‘rami buyumlarni tashishning butun davrida saqlash imkonini berishi kerak.

Jomadon, sandiq, savat, yashik, quti va toylar mustahkam bog‘lanadi. Har bir bagaj joyi uni ortish, qayta ortish va tushirish imkonini beradigan moslamaga ega bo‘lishi lozim.

Nosoz o‘ramdagi bagaj tashishga qabul qilinmaydi. Agar o‘ramdagi kamchilik bagajning yo‘qolishi yoki buzilishi xavfini keltirib chiqarmasa, kamchilik tashish hujjatida qayd etilgan holda bagaj qabul qilinishi mumkin.

Har bir bagaj joyi belgilangan tartibda markirovkalanadi. Markirovkalash tashuvchi tomonidan amalga oshirilsa, buning uchun belgilangan yig‘im undirilishi mumkin.

Tashish taqiqlangan buyumlar

Yo‘lovchilar tashish poezdlarida tashilishi taqiqlangan yoki cheklangan xavfli moddalar va buyumlar bagaj sifatida qabul qilinmaydi.

Bagaj belgilangan xavfsizlik talablariga muvofiq ko‘zdan kechiriladi. Ko‘zdan kechirishdan o‘tkazish imkoni bo‘lmagan buyumni tashuvchi qabul qilmasligi mumkin.

Mo‘rt va tez buziladigan buyumlar

Yo‘lovchi boshqa buyumlar orasiga joylagan mo‘rt buyumlar, tez buziladigan mahsulotlar, shuningdek alohida o‘ralgan oyna, chinni, televizor va shu kabi buyumlar uchun maxsus ehtiyotkorlik talab etiladi.

Agar o‘ramning tashqi qismida bagaj shikastlanishiga sabab bo‘lgan buzilish mavjud bo‘lmasa, tashuvchi mo‘rt buyumning sinishi yoki tez buziladigan mahsulotning yaroqsiz holga kelishi uchun javob bermaydi.

Bagajni topshirish va rasmiylashtirish

Bagaj:

yo‘lovchining jo‘nash stantsiyasida;
yo‘nalishdagi bagaj operatsiyalari uchun ochiq oraliq stantsiyada topshirilishi mumkin.

Manzil sifatida yo‘lovchining oxirgi stantsiyasidan tashqari, yo‘nalishda joylashgan va bagaj operatsiyalari uchun ochiq boshqa stantsiya ham ko‘rsatilishi mumkin.

Bagaj qabul qilinganda uning vazniga qarab bir yoki bir nechta bagaj kvitantsiyasi rasmiylashtiriladi.

Yo‘lovchi chiptani ko‘rsatganida tashuvchi bagajni qabul qilishi va uni tegishli yo‘nalishda bagaj vagoni mavjud bo‘lgan birinchi yo‘lovchi poezdi yoki pochta-bagaj poezdida jo‘natishi shart.

Bagaj tashish tartibi Vazirlar Mahkamasining 2012-yil 13-apreldagi 109-son qarori, xavfli moddalar va buyumlarga oid talablar esa Vazirlar Mahkamasining 2023-yil 17-apreldagi 159-son qarori bilan belgilangan.