Temir yo‘lga talabnoma (pretenziya) yuborish

Dastlabki talabnoma berish

Temir yo‘lda yo‘lovchi, bagaj yoki yuk tashish bilan bog‘liq nizo yuzaga kelsa, sudga da’vo kiritishdan oldin temir yo‘lga yozma talabnoma — pretenziya taqdim etiladi.

Talabnoma temir yo‘l rahbariga yuboriladi. Rahbar uni ko‘rib chiqishni hududiy yoki boshqa tarkibiy bo‘linmaga yuklashi mumkin.

Talabnoma uning topshirilgan sanasini tasdiqlash imkonini beradigan usulda yuborilishi kerak. Shaxsan berilganda qabul qilinganligi haqida belgi qo‘ydirish, pochta orqali yuborilganda esa jo‘natish hujjatlarini saqlash lozim.

Bagaj bilan bog‘liq talabnomalar

Bagaj yo‘qolganda talabnomani bagaj egasi beradi va bagaj kvitantsiyasining aslini taqdim etadi.

Bagaj:

kam chiqqan;
buzilgan;
shikastlangan;
kechiktirib etkazilgan bo‘lsa, temir yo‘l bergan tegishli dalolatnoma ilova qilinadi.

Yo‘qolgan bagaj bo‘yicha talabnoma etkazish muddati tugaganidan keyin 10 sutka o‘tgach berilishi mumkin.

Bagajning kamomadi, buzilishi, shikastlanishi yoki kechikishi bo‘yicha muddat bagaj berilgan kundan hisoblanadi.

Yuk bilan bog‘liq talabnomalar

Yuk yo‘qolganda talabnoma:

yuk qabul qiluvchi tomonidan — yuk kelmaganligi haqida manzil stantsiyasining belgisi qo‘yilgan yuk kvitantsiyasi;
yuk jo‘natuvchi tomonidan — yuk kvitantsiyasining asli bilan beriladi.

Yukning yo‘qolishi bo‘yicha talabnoma etkazish muddati tugaganidan keyin 30 sutka o‘tgach beriladi.

Yuk kam chiqqan, buzilgan yoki shikastlangan bo‘lsa, yuk xati va tijorat dalolatnomasi ilova qilinadi. Yuk kechiktirib etkazilganda yuk qabul qiluvchi yuk xatining aslini taqdim etadi.

Talabnomaning mazmuni

Talabnomada:

murojaat qiluvchining ma’lumotlari;
tashish hujjatlari rekvizitlari;
jo‘nash va manzil stantsiyalari;
huquq buzilishi holatlari;
talab qilinayotgan summa va uning hisob-kitobi;
bank rekvizitlari;
ilovalar ro‘yxati ko‘rsatiladi.

Yukning qiymati, miqdori, yo‘qolishi yoki shikastlanishiga oid talabnomaga tegishli moliyaviy va tasdiqlovchi hujjatlar ham ilova qilinadi.

Murojaat muddatlari

Temir yo‘lga talabnoma:

umumiy talablar bo‘yicha — 6 oy ichida;
jarima to‘lash to‘g‘risida — 45 kun ichida beriladi.

Muddatning boshlanishi talab turiga bog‘liq: u bagaj yoki yuk berilgan kundan, etkazish muddati tugaganidan yoxud huquq buzilishiga sabab bo‘lgan boshqa voqea sodir bo‘lgan kundan hisoblanishi mumkin.

Ko‘rib chiqish muddati

Temir yo‘l talabnomani:

tashish bilan bog‘liq masalalar bo‘yicha — 3 oy ichida;
jarima to‘lash masalasi bo‘yicha — 45 kun ichida ko‘rib chiqadi.

Talabnoma qisman qanoatlantirilsa yoki rad etilsa, javobda qaror sabablari va huquqiy asoslari ko‘rsatilishi kerak.

Temir yo‘lga talabnoma taqdim etish tartibi Vazirlar Mahkamasining 2008-yil 23-oktabrdagi 232-son qarori bilan tasdiqlangan Temir yo‘l ustavida belgilangan.

Maqola foydali bo‘ldimi?

Bo‘limlar