Pensiya miqdori qanday hisoblanadi?

Pensiyaning tayanch miqdori — pensiya turiga qarab qonunchilikda belgilangan foiz asosida hisoblanadigan asosiy miqdor.

Pensiyani hisoblashning bazaviy miqdori — pensiyalar, ustamalar va qo‘shimcha to‘lovlarni hisoblashda qo‘llaniladigan belgilangan miqdor.

Pensiya miqdori fuqaroning ish staji va ish haqiga bog‘liq bo‘lib, quyidagilardan tarkib topadi:

pensiyaning tayanch miqdori;
belgilangan talabdan ortiq ish staji uchun pensiyaning oshirilishi;
qonunchilikda nazarda tutilgan ustama haqlar.

Pensiya miqdori rasman belgilangan eng kam iste’mol xarajatlaridan kam bo‘lishi mumkin emas.

Qaysi davrdagi ish haqi hisobga olinadi?

Pensiyani hisoblash uchun fuqaroning mehnat faoliyatidagi mavjud tanaffuslardan qat’i nazar, oxirgi o‘n yillik mehnat faoliyati davomidagi ketma-ket besh yil ish haqi olinadi.

Oxirgi o‘n yildagi ketma-ket besh yil uchun ish haqining eng yuqori miqdori axborot tizimidagi yoki fuqaro taqdim etgan ma’lumotlar asosida avtomatik aniqlanadi.

O‘rtacha oylik ish haqi ketma-ket ishlangan 60 kalendarь oy uchun qayta hisoblangan ish haqining umumiy miqdorini 60 ga bo‘lish orqali aniqlanadi.

Agar fuqaro besh yildan kam ishlagan bo‘lsa, o‘rtacha oylik ish haqi ishlangan kalendarь oylar uchun ish haqining umumiy miqdorini shu oylar soniga bo‘lish orqali hisoblanadi.

Pensiya qachon qayta hisoblanadi?

Pensiya miqdorini qayta hisoblash uchun quyidagilar asos bo‘ladi:

pensiya hujjatlar yig‘majildida mavjud bo‘lmagan, ish staji yoki ish haqiga oid qo‘shimcha hujjatlar taqdim etilishi;
nogironlik guruhining o‘zgarishi;
boquvchisini yo‘qotganlik pensiyasini oluvchi oila a’zolari sonining o‘zgarishi;
ustama haq olish huquqi paydo bo‘lishi;
pensiyani hisoblashning bazaviy miqdori o‘zgarishi;
daromadlarni indeksatsiya qilish.

Pensiyani qayta hisoblash to‘g‘risidagi ariza pensionerning yashash joyi bo‘yicha Pensiya jamg‘armasining tuman yoki shahar bo‘limiga beriladi.

Ariza besh kun ichida ko‘rib chiqiladi.

Qachon ariza berish talab qilinmaydi?

Quyidagi hollarda pensiya avtomatik qayta hisoblanadi:

pensiyani hisoblash tartibi yoki bazaviy miqdor o‘zgarganda;
tayinlangan pensiya miqdorini kamaytiruvchi holatlar yuzaga kelganda;
nogironlik guruhi o‘zgarganda;
I guruh nogironligi belgilanganda;
qonunchilikda nazarda tutilgan boshqa holatlarda.

Normativ hujjatlar

«Fuqarolarning davlat pensiya ta’minoti to‘g‘risida»gi Qonun

Vazirlar Mahkamasining 2022-yil 13-oktabrdagi 592-son qarori

Maqola foydali bo‘ldimi?

Bo‘limlar