Shaharsozlik sohasidagi vakolatli davlat organlari

Shaharsozlik sohasida davlat boshqaruvi

Shaharsozlik sohasidagi davlat boshqaruvi quyidagi organlar tomonidan amalga oshiriladi:

O‘zbekiston Respublikasi Vazirlar Mahkamasi;
shaharsozlik faoliyati sohasidagi maxsus vakolatli davlat organi;
mahalliy ijro etuvchi hokimiyat organlari.

Maxsus vakolatli davlat organi o‘z vakolatlari doirasida qabul qilgan qarorlar vazirliklar, idoralar, boshqa davlat organlari, mahalliy ijro etuvchi hokimiyat organlari, yuridik va jismoniy shaxslar uchun majburiydir.

Vazirlar Mahkamasining vakolatlari

Vazirlar Mahkamasi shaharsozlik sohasida:

yagona davlat siyosatining amalga oshirilishini ta’minlaydi;
kompleks davlat dasturlarini ishlab chiqadi va tasdiqlaydi;
o‘z vakolatlari doirasida normativ-huquqiy hujjatlar qabul qiladi;
alohida shaharlar va umumdavlat ahamiyatiga molik ob’ektlarning bosh rejalarini tasdiqlaydi;
umumdavlat ahamiyatiga molik, alohida tartibga solinadigan shaharsozlik ob’ektlarining chegaralarini belgilaydi;
Respublika arxitektura-shaharsozlik kengashi faoliyatini muvofiqlashtiradi.

Maxsus vakolatli davlat organi

Shaharsozlik kodeksiga muvofiq, O‘zbekiston Respublikasi Qurilish va uy-joy kommunal xo‘jaligi vazirligi shaharsozlik faoliyati sohasidagi maxsus vakolatli davlat organidir.

Vazirlik:

shaharsozlik sohasida yagona davlat siyosatini amalga oshiradi;
O‘zbekiston hududini rivojlantirishni rejalashtirish bosh tarhi ishlab chiqilishini ta’minlaydi;
Qoraqalpog‘iston Respublikasi va viloyatlar hududlarini rivojlantirish tarhlarini ishlab chiqishni tashkil etadi;
qonunchilikda Vazirlar Mahkamasi vakolatiga kiritilmagan shaharlar va shaharchalarning bosh rejalarini tasdiqlaydi;
shaharsozlik normalari va qoidalarini ishlab chiqadi hamda tasdiqlaydi;
shaharsozlik hujjatlarining ishlab chiqilishi, ekspertizasi va amalga oshirilishi ustidan monitoring olib boradi;
shaharsozlik sohasidagi huquqbuzarliklar bo‘yicha belgilangan choralarni qo‘llaydi.

Qurilish va uy-joy kommunal xo‘jaligi vazirligining o‘z vakolatlari doirasida qabul qilgan qarorlariga yuridik va jismoniy shaxslar ham rioya etishi shart.

Hududiy va mahalliy organlarning vakolatlari

Qoraqalpog‘iston Respublikasi Vazirlar Kengashi, viloyatlar va Toshkent shahar ijro etuvchi hokimiyat organlari:

shaharsozlik qonunchiligiga rioya etilishini ta’minlaydi;
aholini oqilona joylashtirish va infratuzilmani rivojlantirish masalalarini hal qiladi;
mahalliy ahamiyatga molik ob’ektlarning shaharsozlik hujjatlarini ishlab chiqishda buyurtmachi vazifasini bajaradi;
aholi punktlarining shaharsozlik hujjatlari ishlab chiqilishi va ekspertizadan o‘tkazilishini ta’minlaydi;
shaharsozlik sohasida qabul qilinayotgan qarorlar haqida aholini xabardor qiladi.

Tuman va shahar ijro etuvchi hokimiyat organlari o‘z hududida shaharsozlik qonunchiligiga rioya etilishini ta’minlaydi, mahalliy ob’ektlar bo‘yicha buyurtmachi vazifasini bajaradi hamda qonunchilik talablariga mos kelmaydigan shaharsozlik faoliyatini cheklashi, to‘xtatib turishi yoki taqiqlashi mumkin.