Avtotransport vositalari oynalarining tusini o‘zgartirishga (tonirovka) ruxsatnoma olish

Ruxsatnoma talab etilmaydigan holatlar

Quyidagi oynalarni tasdiqlangan davlat standartiga muvofiq, yorug‘lik o‘tkazuvchanligi cheklanmagan darajada qoraytirish uchun ruxsatnoma talab etilmaydi:

avtotransport vositasining orqa oynasi;
M1, N1 va N2 toifadagi transport vositalarining orqa yon oynalari;
old oynaning yuqori qismidagi 14 santimetrdan keng bo‘lmagan tasma.

Engil avtomobilь va M1, N1, N2 toifadagi transport vositalarining orqa yon oynalarini qoraytirish uchun ruxsatnoma va to‘lov talab etilmaydi.

Ruxsatnoma talab etiladigan holatlar

M1, N1 va N2 toifadagi transport vositalarining old yon oynalarini qoraytirish faqat ruxsatnoma asosida amalga oshiriladi. Bunda old yon oynalarning yorug‘lik o‘tkazuvchanligi 30 foizdan kam bo‘lmasligi kerak.

Ruxsatnoma Ichki ishlar vazirligi Davlat yo‘l harakati xavfsizligi xizmati tomonidan 1 yil muddatga beriladi.

Ariza berish va ruxsatnomani olish

Arizani Davlat yo‘l harakati xavfsizligi xizmatiga bevosita yoki Yagona interaktiv davlat xizmatlari portali orqali berish mumkin.

YaIDXP orqali murojaat qilishda:

ariza beruvchi elektron so‘rovnomani to‘ldiradi;
transport vositasi va uning egasi haqidagi ma’lumotlar avtomatik tekshiriladi;
to‘lov uchun elektron invoys shakllantiriladi;
to‘lov 10 kun ichida amalga oshiriladi;
QR-kodli ruxsatnoma to‘lov to‘liq amalga oshirilganidan keyin 2 soat ichida shaxsiy kabinetga yuboriladi.

Ruxsatnoma haqidagi ma’lumot transport vositasining elektron hisob ma’lumotlariga kiritiladi. Haydovchidan uni qog‘oz shaklida olib yurish talab etilmaydi.

To‘lov miqdori

M1, N1 va N2 toifadagi transport vositalarining old va orqa yon oynalarini qoraytirish uchun:

jismoniy va yuridik shaxslar — 8 BHM;
O‘zbekistonda faoliyat ko‘rsatayotgan xorijiy yuridik shaxslar — 14 BHM to‘laydi.

Xizmat YaIDXP orqali olinganda belgilangan stavkaning 90 foizi, ya’ni tegishlicha 7,2 BHM yoki 12,6 BHM to‘lanadi.

M2 va M3 toifadagi III klass transport vositalari yon oynalarini qoraytirish uchun to‘lov 40 BHMni tashkil etadi.

Rad etish va qayta rasmiylashtirish

So‘rovnomada ma’lumotlar to‘liq ko‘rsatilmagan, noto‘g‘ri ma’lumot kiritilgan yoki to‘lov belgilangan muddatda to‘liq amalga oshirilmagan bo‘lsa, so‘rovnoma avtomatik ravishda rad etiladi. Boshqa asoslar bilan ruxsatnoma berishni rad etishga yo‘l qo‘yilmaydi.

Transport vositasining mulkdori, davlat raqami, ro‘yxatdan o‘tkazish guvohnomasi yoki egasining ma’lumotlari o‘zgarganda ruxsatnoma YaIDXP orqali qo‘shimcha to‘lovsiz qayta rasmiylashtiriladi. Yangi ruxsatnoma avvalgi ruxsatnomaning qolgan amal qilish muddatiga beriladi.