Bolalar nafaqasi yoki moddiy yordamni to‘lash va to‘xtatish

Bolalar nafaqasi muddatidan oldin to‘xtatilishi mumkinmi?

Nafaqa yoki moddiy yordam qachondan to‘lanadi?

Bolalar nafaqasi yoki moddiy yordam uni tayinlashni rad etish uchun asoslar mavjud bo‘lmaganda ariza ko‘rib chiqilgan oydan keyingi oyning birinchi sanasidan boshlab tayinlanadi.

Moliyaviy agent — bolalar nafaqasi va moddiy yordam mablag‘larini oluvchining bank yoki ijtimoiy kartasiga o‘tkazuvchi tashkilot.

To‘lov:

ariza beruvchining bank kartasiga;
yoki ijtimoiy kartasiga

pul mablag‘larini o‘tkazish orqali amalga oshiriladi.

Bolalar nafaqasi yoki moddiy yordam har oyning 4-sanasidan 27-sanasiga qadar to‘lanadi.

Nafaqa qancha muddat to‘lanadi?

To‘lov muddati oilaning Ijtimoiy reestrdagi toifasiga bog‘liq:

«davlat ta’minotidagi oila» va «kambag‘al oila» toifasidagi oilalarga — ushbu toifadan chiqquniga qadar;
«kambag‘allik chegarasidagi oila» toifasidagi oilalarga — mazkur toifaga kiritilgan oydan keyingi 6 oy davomida.

Bolalar nafaqasi eng kichik yoki yagona bola 18 yoshga to‘lgan oyning oxirigacha to‘lanadi.

Bolasiz, barcha farzandlari 18 yoshdan katta bo‘lgan oilalar va yakka-yolg‘iz fuqarolarga moddiy yordam tayinlanishi mumkin.

Bir oilaga bolalar nafaqasi va moddiy yordamni bir vaqtning o‘zida to‘lashga yo‘l qo‘yilmaydi.

To‘lov qachon qayta hisoblanadi?

Nafaqa yoki moddiy yordam avtomatik ravishda qayta hisoblanadi, agar:

oilada bolalar soni o‘zgarsa;
bola tug‘ilsa yoki vasiylikka olinsa;
bolalardan biri vafot etsa;
bola 3 yoshga yoki 18 yoshga to‘lsa;
oilaning har bir a’zosiga to‘g‘ri keladigan daromadi o‘zgarsa;
oilaning Ijtimoiy reestrdagi toifasi o‘zgarsa.

Yangi miqdor yoki to‘lovni to‘xtatish, qoida tariqasida, holat aniqlangan oydan keyingi oyning birinchi sanasidan qo‘llaniladi.

To‘lov qachon to‘xtatiladi?

Bolalar nafaqasi yoki moddiy yordam quyidagi hollarda to‘xtatiladi:

oila Ijtimoiy reestrdan chiqarilganda;
oila «kambag‘allik chegarasidagi oila» toifasiga kiritilganiga 6 oy to‘lganda;
oilaning daromadi yoki boshqa ko‘rsatkichlari belgilangan mezonlarga mos kelmay qolganda;
oilaning eng kichik yoki yagona bolasi 18 yoshga to‘lganda;
oilaning to‘lovni olish huquqiga ta’sir qiluvchi boshqa holatlar aniqlanganda.

Shuningdek, «kambag‘al oila» toifasidagi mehnatga layoqatli, rasmiy band bo‘lmagan oila a’zosi:

6 oy davomida ishga joylashmasa;
yakka tartibdagi tadbirkor yoki o‘zini o‘zi band qilgan shaxs sifatida ro‘yxatdan o‘tmasa;
maqbul ish taklifini ikki yoki undan ortiq marta rad etsa, to‘lov to‘xtatilishi mumkin.

Qonunchilikda belgilangan ayrim toifadagi shaxslarga mazkur bandlik talabi tatbiq etilmaydi.

O‘zgarishlar haqida xabar berish kerakmi?

Ariza beruvchi:

oila tarkibi o‘zgarganda;
bola tug‘ilganda yoki oila a’zosi vafot etganda;
yashash joyi o‘zgarganda;
daromad yoki mol-mulk holati o‘zgarganda;
nafaqa miqdoriga yoki uni olish huquqiga ta’sir qiluvchi boshqa holatlar yuzaga kelganda «Inson» ijtimoiy xizmatlar markaziga o‘z vaqtida xabar berishi kerak.

Noto‘g‘ri ma’lumot taqdim etilishi natijasida ortiqcha to‘langan mablag‘lar belgilangan tartibda qaytarilishi yoki keyingi to‘lovlardan ushlab qolinishi mumkin.

Qonunchilikda nazarda tutilmagan asoslar bo‘yicha nafaqa yoki moddiy yordamdan pul ushlab qolishga yo‘l qo‘yilmaydi.

Normativ hujjatlar

O‘zbekiston Respublikasi Prezidentining 2025-yil 26-dekabrdagi PF–258-son Farmoni

Vazirlar Mahkamasining 2026-yil 29-yanvardagi 35-son qarori