Kripto-aktivlar aylanmasi sohasida yig‘imlar miqdori

Yig‘imni kimlar to‘laydi?

Kripto-aktivlar aylanmasi sohasidagi yig‘im — mayning yoki kripto-aktivlar aylanmasi sohasidagi litsenziyalanadigan faoliyatni amalga oshirish uchun har oy to‘lanadigan majburiy to‘lov.

O‘zbekiston hududida quyidagi faoliyatni amalga oshiruvchi yuridik shaxslar yig‘im to‘laydi:

maynerlar;
kripto-birjalar;
mayning-pullar;
kripto-depozitariylar;
kripto-do‘konlar.

Xizmatlar provayderlari faoliyati Istiqbolli loyihalar milliy agentligi tomonidan berilgan litsenziya asosida amalga oshiriladi.

Yig‘imlar miqdori qancha?

Yig‘im miqdori to‘lov amalga oshirilayotgan sanada amalda bo‘lgan bazaviy hisoblash miqdoriga nisbatan belgilanadi:

mayning faoliyati uchun — BHMning 10 baravari;
kripto-birja faoliyati uchun — BHMning 740 baravari;
mayning-pul faoliyati uchun — BHMning 100 baravari;
kripto-depozitariy faoliyati uchun — BHMning 5 baravari;
kripto-do‘kon faoliyati uchun — BHMning 185 baravari.

Bazaviy hisoblash miqdori — soliqlar, yig‘imlar, davlat bojlari, jarimalar va boshqa to‘lovlarni hisoblashda qo‘llaniladigan belgilangan miqdor.

Yig‘im qachondan hisoblanadi?

Yig‘im litsenziya yoki mayningni amalga oshirish uchun ruxsat etish xususiyatiga ega hujjat olingan paytdan boshlab har oy hisoblanadi.

Agar litsenziya yoki ruxsatnoma:

oyning 20-sanasiga qadar olinsa, yig‘im shu oy uchun to‘liq miqdorda to‘lanadi;
oyning 20-sanasidan keyin olinsa, yig‘im keyingi oyning birinchi sanasidan hisoblanadi.

Yig‘im qachon to‘lanadi?

Yig‘im har oy uchun oldindan, qoida tariqasida, shu oyning 10-sanasiga qadar Istiqbolli loyihalar milliy agentligining g‘azna hisobvarag‘iga o‘tkaziladi.

Agar litsenziya oyning 20-sanasiga qadar olingan bo‘lsa, birinchi yig‘im shu oyning oxirgi sanasiga qadar to‘lanadi.

Yig‘imlarning:

80 foizi — Davlat byudjetiga;
20 foizi — Istiqbolli loyihalar milliy agentligining g‘azna hisobvarag‘iga

yo‘naltiriladi.

Faoliyat to‘xtatilganda yig‘im ham to‘xtaydimi?

Kripto-aktivlar aylanmasi sohasidagi faoliyat belgilangan tartibda to‘xtatib turilsa yoki tugatilsa, yig‘imni hisoblash keyingi oyning birinchi sanasidan to‘xtatiladi.

Faoliyat qayta tiklangan taqdirda yig‘im qonunchilikda belgilangan tartibda yana hisoblanadi.

Kimlar yig‘imdan ozod qilingan?

Qoraqalpog‘iston Respublikasida tashkil etiladigan «Besqala Mining Valley» maxsus mayning zonasi rezidentlari 2035-yil 1 yanvarga qadar mazkur yig‘imlarni to‘lashdan ozod qilingan.

Ushbu imtiyozdan foydalanish uchun yuridik shaxs maxsus mayning zonasining rezidenti maqomiga ega bo‘lishi kerak.

Normativ hujjatlar

Kripto-aktivlar aylanmasi sohasidagi faoliyat uchun yig‘imlar miqdori, ularni to‘lash va taqsimlash tartibi to‘g‘risidagi nizom

2026-yil 27-iyulda ro‘yxatdan o‘tgan 3388-2-son qaror