Крипто-активлар айланмаси соҳасида йиғимлар миқдори

Йиғимни кимлар тўлайди?

Крипто-активлар айланмаси соҳасидаги йиғим — майнинг ёки крипто-активлар айланмаси соҳасидаги лицензияланадиган фаолиятни амалга ошириш учун ҳар ой тўланадиган мажбурий тўлов.

Ўзбекистон ҳудудида қуйидаги фаолиятни амалга оширувчи юридик шахслар йиғим тўлайди:

майнерлар;
крипто-биржалар;
майнинг-пуллар;
крипто-депозитарийлар;
крипто-дўконлар.

Хизматлар провайдерлари фаолияти Истиқболли лойиҳалар миллий агентлиги томонидан берилган лицензия асосида амалга оширилади.

Йиғимлар миқдори қанча?

Йиғим миқдори тўлов амалга оширилаётган санада амалда бўлган базавий ҳисоблаш миқдорига нисбатан белгиланади:

майнинг фаолияти учун — БҲМнинг 10 баравари;
крипто-биржа фаолияти учун — БҲМнинг 740 баравари;
майнинг-пул фаолияти учун — БҲМнинг 100 баравари;
крипто-депозитарий фаолияти учун — БҲМнинг 5 баравари;
крипто-дўкон фаолияти учун — БҲМнинг 185 баравари.

Базавий ҳисоблаш миқдори — солиқлар, йиғимлар, давлат божлари, жарималар ва бошқа тўловларни ҳисоблашда қўлланиладиган белгиланган миқдор.

Йиғим қачондан ҳисобланади?

Йиғим лицензия ёки майнингни амалга ошириш учун рухсат этиш хусусиятига эга ҳужжат олинган пайтдан бошлаб ҳар ой ҳисобланади.

Агар лицензия ёки рухсатнома:

ойнинг 20-санасига қадар олинса, йиғим шу ой учун тўлиқ миқдорда тўланади;
ойнинг 20-санасидан кейин олинса, йиғим кейинги ойнинг биринчи санасидан ҳисобланади.

Йиғим қачон тўланади?

Йиғим ҳар ой учун олдиндан, қоида тариқасида, шу ойнинг 10-санасига қадар Истиқболли лойиҳалар миллий агентлигининг ғазна ҳисобварағига ўтказилади.

Агар лицензия ойнинг 20-санасига қадар олинган бўлса, биринчи йиғим шу ойнинг охирги санасига қадар тўланади.

Йиғимларнинг:

80 фоизи — Давлат бюджетига;
20 фоизи — Истиқболли лойиҳалар миллий агентлигининг ғазна ҳисобварағига

йўналтирилади.

Фаолият тўхтатилганда йиғим ҳам тўхтайдими?

Крипто-активлар айланмаси соҳасидаги фаолият белгиланган тартибда тўхтатиб турилса ёки тугатилса, йиғимни ҳисоблаш кейинги ойнинг биринчи санасидан тўхтатилади.

Фаолият қайта тикланган тақдирда йиғим қонунчиликда белгиланган тартибда яна ҳисобланади.

Кимлар йиғимдан озод қилинган?

Қорақалпоғистон Республикасида ташкил этиладиган «Besqala Mining Valley» махсус майнинг зонаси резидентлари 2035 йил 1 январга қадар мазкур йиғимларни тўлашдан озод қилинган.

Ушбу имтиёздан фойдаланиш учун юридик шахс махсус майнинг зонасининг резиденти мақомига эга бўлиши керак.

Норматив ҳужжатлар

Крипто-активлар айланмаси соҳасидаги фаолият учун йиғимлар миқдори, уларни тўлаш ва тақсимлаш тартиби тўғрисидаги низом

2026 йил 27 июлда рўйхатдан ўтган 3388-2-сон қарор