Kripto-do‘kon nima?

Kripto-do‘kon — kripto-aktivlarni sotib olish yoki sotish bo‘yicha xizmatlarni elektron platforma va yoki savdo ob’ekti orqali ko‘rsatuvchi yuridik shaxs.

Kripto-do‘kon O‘zbekistonda faqat Istiqbolli loyihalar milliy agentligi bergan litsenziya asosida faoliyat yuritishi mumkin.

Operatsiyani amalga oshirishdan oldin xizmat ko‘rsatuvchining litsenziyasi Agentlikning elektron reestri orqali tekshirilishi lozim.

Kimlar kripto-do‘kondan foydalanishi mumkin?

Kripto-do‘kon mijoz bilan shartnoma tuzishdan oldin uni majburiy identifikatsiyadan o‘tkazadi.

Mijoz:

• 18 yoshga to‘lgan bo‘lishi;
• shaxsini tasdiqlovchi hujjat nusxasini taqdim etishi;
• JShShIRini ko‘rsatishi;
• telefon raqami yoki elektron pochta manzilini bildirishi;
• talab qilingan boshqa ma’lumotlarni taqdim etishi kerak.

Kripto-do‘kon 18 yoshga to‘lmagan shaxs bilan shartnoma tuzmaydi.

Majburiy identifikatsiya — operatsiyani amalga oshirayotgan shaxsning kimligini hujjatlar va boshqa ma’lumotlar orqali aniqlash jarayoni.

Shartnoma qanday tuziladi?

Kripto-do‘kon orqali operatsiya qilish uchun mijoz bilan shartnoma tuziladi.

Savdo ob’ektida shartnoma yozma shaklda ikki nusxada rasmiylashtiriladi. Elektron platformada esa shartnoma elektron oferta va uni qabul qilish orqali tuzilishi mumkin.

Shartnoma tuzilishidan oldin mijozga:

• operatsiyalarni amalga oshirish shartlari;
• komissiya va boshqa to‘lovlar;
• kripto-aktivning narxi;
• taraflarning huquq va majburiyatlari;
• nizolarni hal qilish tartibi tushuntirilishi kerak.

Elektron platforma orqali qanday operatsiyalar mumkin?

Kripto-do‘konning elektron platformasi orqali:

• jismoniy shaxslar bank o‘tkazmasi bilan kripto-aktivlarni milliy valyutada sotib olishi yoki sotishi;
• chet ellik jismoniy shaxslar bank o‘tkazmasi bilan kripto-aktivlarni xorijiy valyutada sotib olishi yoki sotishi mumkin.

Elektron platformada har bir mijoz uchun faqat bitta shaxsiy kabinet ochiladi.

Savdo ob’ekti orqali qanday operatsiyalar mumkin?

Kripto-do‘konning savdo ob’ekti orqali:

• jismoniy shaxslar bank o‘tkazmasi bilan kripto-aktiv sotib olishi;
• mijozlar milliy yoki xorijiy valyutada naqd pul to‘lab kripto-aktiv sotib olishi;
• mijozlar kripto-aktivni faqat milliy valyutada sotishi mumkin.

Operatsiya amalga oshirilganidan keyin kripto-do‘kon mijozga uni tasdiqlovchi ma’lumotnoma yoki elektron hujjat taqdim etadi.

Qanday operatsiyalar taqiqlangan?

Kripto-do‘konda:

• anonim kripto-aktivlar bilan operatsiyalar;
• O‘zbekiston rezidentlari chiqargan, belgilangan tartibda ro‘yxatdan o‘tkazilmagan kripto-aktivlar bilan operatsiyalar;
• qoidalarda ruxsat etilmagan boshqa operatsiyalar amalga oshirilishi mumkin emas.

Kripto-aktivlardan O‘zbekiston hududida tovar, ish yoki xizmat uchun to‘lov vositasi sifatida foydalanish taqiqlangan.

Kripto-do‘kon mijoz mablag‘larini saqlaydimi?

Kripto-do‘kon mijozning pul mablag‘lari yoki kripto-aktivlarini doimiy saqlashga, shuningdek mijoz nomidan uning hisobidan mustaqil savdo qilishga haqli emas.

Kripto-do‘kon operatsiya bo‘yicha o‘z majburiyatlarini bajarishi va amalga oshirilgan operatsiyalar hisobini yuritishi shart.

Xavfsizlik uchun nimalarga e’tibor berish kerak?

Operatsiyadan oldin:

• xizmat ko‘rsatuvchining litsenziyasini tekshirish;
• sayt manzili va mobil ilovaning haqiqiyligini aniqlash;
• shartnoma va komissiyalarni o‘qish;
• shaxsiy kabinet parolini boshqalarga bermaslik;
• SMS-kod, maxfiy kalit va kripto-hamyonni tiklash iborasini oshkor qilmaslik;
• operatsiya tasdiqnomasini saqlash kerak.

Kripto-aktiv narxining oshishi yoki pasayishi kafolatlanmaydi. Uni tanlash va moliyaviy tavakkalchilik mijozning o‘ziga tegishli.

Nizo kelib chiqsa nima qilish mumkin?

Avvalo kripto-do‘konga yozma yoki elektron murojaat yuborish lozim.

Mijoz o‘z operatsiyalari haqidagi hisobotni so‘rash huquqiga ega. Kripto-do‘kon tegishli ma’lumotni so‘rov olingan kundan boshlab 15 kundan kechiktirmay taqdim etishi kerak.

Nizo kelishuv orqali hal qilinmasa, Istiqbolli loyihalar milliy agentligiga yoki sudga murojaat qilish mumkin.