Turizm sohasida davlat qo‘llab-quvvatlashi: savol-javoblar

Davlatning turizm sohasidagi siyosati nimalarni qamrab oladi?

Davlat siyosati turizmni iqtisodiyotning strategik tarmoqlaridan biri sifatida rivojlantirish, fuqarolarning dam olish va erkin harakatlanish huquqini ta’minlash, turistlarning xavfsizligini himoya qilish, ichki va ijtimoiy turizmni rivojlantirishga qaratilgan.

Shuningdek, turizm sohasida tadbirkorlik va investitsiyalarni rag‘batlantirish, davlat-xususiy sheriklikni rivojlantirish, raqobat uchun teng sharoit yaratish, zamonaviy texnologiyalarni joriy etish va turistik klasterlarni rivojlantirish davlat siyosatining asosiy yo‘nalishlari qatoriga kiradi.

«O‘zbekiston bo‘ylab sayohat qil!» dasturida qanday imkoniyatlar bor?

Mehnat jamoalarida jamoa shartnomalariga xodimlar uchun yiliga kamida bir marta mahalliy sayohat tashkil etish va xarajatlarning bir qismini ish beruvchining byudjetdan tashqari mablag‘lari hisobidan qoplash imkoniyatini kiritish nazarda tutilgan.

Belgilangan turistik platforma orqali O‘zbekiston bo‘ylab sayohat qilganda ayrim xarajatlarning bir qismi keshbek tarzida qaytariladi. Jumladan:

aviachipta xarajatining 15 foizi — 150 ming so‘mgacha;
temir yo‘l yoki avtobus chiptasi xarajatining 15 foizi — 80 ming so‘mgacha;
joylashtirish xarajatining 15 foizi — 80 ming so‘mgacha;
teatr, muzey, tsirk yoki badiiy galereya chiptasi xarajatining 50 foizi — 20 ming so‘mgacha qaytarilishi mumkin.

Keshbek belgilangan elektron platforma orqali rasmiylashtirilgan va tegishli shartlarga javob beradigan sayohatlar uchun bank kartasiga qaytariladi.

Yosh tadbirkorlarga turizm sohasida qanday grant ajratilishi mumkin?

Amaldagi farmonda turizm sohasidagi yosh tadbirkorlarning loyihalari uchun har bir tashabbusga 50 mln so‘m miqdorida grant, ushbu maqsadlar uchun jami 10 mlrd so‘m mablag‘ ajratish nazarda tutilgan.

Grant turizm sohasidagi veb-saytlar yaratish, ularni xorijiy ijtimoiy tarmoqlarda targ‘ib qilish va xorijiy turistik ko‘rgazma hamda yarmarkalarda ishtirok etish kabi loyihalar uchun belgilangan tartibda beriladi.

Grant oluvchi tashabbuskor 3 yil davomida kamida 200 nafar xorijiy turistning O‘zbekistonga sayohatini tashkil etishi shart.

Turkiy davlatlar bilan ziyorat turizmi qanday rivojlantirilmoqda?

Turkiy davlatlar o‘rtasida ziyorat turizmini rivojlantirish maqsadida «Tabarruk ziyorat» turizm kontseptsiyasi qabul qilingan. U umumiy ziyorat yo‘nalishlarini shakllantirish, turistik ob’ektlarni targ‘ib qilish, axborot almashish va turizm sohasidagi hamkorlikni kengaytirishni nazarda tutadi.

Normativ hujjatlar

Maqola foydali bo‘ldimi?

Bo‘limlar