Manzil-ma’lumot axborotlari to‘g‘risida ma’lumotnoma olish

Xizmatning mazmuni

Manzil-ma’lumot axborotlari to‘g‘risidagi ma’lumotnoma jismoniy shaxsning:

doimiy yashash joyi bo‘yicha ro‘yxatdan o‘tganligi;
doimiy ro‘yxatdan chiqarilganligi;
vaqtincha turgan joyi bo‘yicha ro‘yxatdan o‘tganligi;
manzil-ma’lumot axborot tizimida u haqda ma’lumot mavjud emasligi

to‘g‘risidagi rasmiy ma’lumotni tasdiqlaydi.

Muhim! Fuqaroga boshqa shaxsning emas, faqat o‘zining manzil-ma’lumot axboroti taqdim etiladi.

Murojaat qiluvchilar

Davlat xizmatidan jismoniy shaxslar foydalanishi mumkin.

Ariza Davlat xizmatlari markazi orqali yoki Yagona interaktiv davlat xizmatlari portali orqali elektron shaklda beriladi.

Talab etiladigan ma’lumotlar

So‘rovnomada, jumladan, quyidagi ma’lumotlar ko‘rsatiladi:

familiya, ism va otasining ismi, shu jumladan ilgari o‘zgargan bo‘lsa, avvalgi ma’lumotlar;
pasport yoki ID-karta ma’lumotlari;
JShShIR;
ma’lumotnomani olish tili — o‘zbek yoki rus tili;
yashash manzili;
telefon raqami;
elektron pochta manzili — mavjud bo‘lsa.

Qonunchilikda nazarda tutilmagan qo‘shimcha hujjat yoki ma’lumotlarni talab qilishga yo‘l qo‘yilmaydi.

Yig‘im va xizmat ko‘rsatish muddati

Davlat xizmatini ko‘rsatganlik uchun bazaviy hisoblash miqdorining 3 foizi miqdorida yig‘im undiriladi.

Ma’lumotnoma axborot tizimi orqali avtomatik ravishda, real vaqt rejimida shakllantiriladi.

Ma’lumotnoma elektron shaklda QR-kod bilan tasdiqlanadi va ariza beruvchining shaxsiy kabinetiga yuboriladi. Davlat xizmatlari markazi orqali murojaat qilinganda, ma’lumotnoma ariza beruvchining xohishiga ko‘ra elektron yoki qog‘oz shaklda beriladi.