O‘zbekiston mahallalari uyushmasi

Uyushmaning asosiy vazifalari nimalardan iborat?

O‘zbekiston mahallalari uyushmasi mahallalarning aholi bilan davlat o‘rtasidagi «ko‘prik» sifatidagi rolini kuchaytirish, mahalla boshqaruvida aholining ishtirokini kengaytirish va joylardagi muammolarni hal etishga ko‘maklashish maqsadida tashkil etilgan. Uyushmaning Qoraqalpog‘iston Respublikasi, viloyatlar va Toshkent shahri boshqarmalari, shuningdek tuman va shahar bo‘limlari mavjud.

Uyushmaning asosiy vazifalariga:

mahallani jamoatchilik boshqaruvi va nazoratining tayanch bo‘g‘iniga aylantirish;
aholining mahalla boshqaruvidagi ishtirokini kuchaytirish;
«mahalla ettiligi» faoliyatini muvofiqlashtirishga ko‘maklashish;
mahallalardagi muammolarni hal etishda davlat organlari va tashkilotlari vakillarining sa’y-harakatlarini birlashtirish;
kambag‘al oilalarga ajratiladigan mablag‘larning manzilli yo‘naltirilishiga ko‘maklashish;
mahallalarning moddiy-texnika ta’minotini va raqamlashtirilishini yaxshilash;
mahalla mas’ullarining malakasini oshirish kiradi.

«Mahalla ettiligi»ga kimlar kiradi?

«Mahalla ettiligi» jamoatchilik asosida hamkorlik qiladigan quyidagi mas’ullardan iborat:

mahalla raisi;
hokim yordamchisi;
yoshlar etakchisi;
xotin-qizlar faoli;
profilaktika inspektori;
ijtimoiy xodim;
soliq inspektori.

Har bir a’zo o‘z sohasi bo‘yicha aholi muammolarini aniqlash va hal etishda ishtirok etadi. Jumladan, ijtimoiy xodim og‘ir ahvoldagi shaxs va oilalarga ijtimoiy xizmatlarni tashkil etadi, soliq inspektori esa tadbirkorlarga soliq xizmatlarini ko‘rsatish va mahalla byudjeti daromadlarini shakllantirishda ishtirok etadi.

Ijtimoiy yordam qanday ajratiladi?

Jismoniy shaxslarni «Temir daftar», «Yoshlar daftari» va «Ayollar daftari»ga kiritish, shuningdek tegishli daftarlar va davlat jamg‘armalari orqali ayrim ijtimoiy yordamlar hamda subsidiyalarni ajratish «mahalla ettiligi»ning kollegial qarori asosida amalga oshiriladi.

Mahallalarga tegishli mablag‘larni taqsimlashda aholi soni, Ijtimoiy reestrga kiritilgan oilalar soni va nogironligi bo‘lgan shaxslar soni hisobga olinadi.

«Mahalla byudjeti» qanday shakllanadi?

Har bir mahallada ijtimoiy-iqtisodiy muammolarni hal etish jamg‘armasi mavjud. Uning mablag‘lari, jumladan:

jismoniy shaxslardan undirilgan mol-mulk va er solig‘ining belgilangan qismidan — 10 foiz;
mahalla idoralari orqali ko‘rsatilgan davlat xizmatlari uchun undirilgan yig‘imning 10 foizi;
2026-yil 1-iyuldan mahalla hududida sanitariya qoidalarini buzish va noqonuniy qurilish uchun undirilgan jarimalarning 10 foizi hisobidan shakllantiriladi.

Normativ hujjatlar

Maqola foydali bo‘ldimi?

Bo‘limlar