Davlat hokimiyati va boshqaruvi organlari faoliyatining ochiqligi to‘g‘risida

Ochiqlikning asosiy printsiplari

Davlat hokimiyati va boshqaruvi organlari faoliyatining ochiqligi quyidagi printsiplarga asoslanadi:

axborotdan hammaning foydalanishi mumkinligi;
axborotning o‘z vaqtida taqdim etilishi va ishonchliligi;
davlat organlari faoliyatining oshkoraligi va shaffofligi;
axborotni izlash, olish va tarqatish erkinligi;
shaxsning sha’ni, qadr-qimmati, shaxsiy hayoti va ishchanlik obro‘sini himoya qilish.

Ochiq axborot tarkibi

Davlat organlari faoliyati to‘g‘risidagi axborotga, jumladan:

organ va uning hududiy bo‘linmalarining huquqiy maqomini belgilovchi hujjatlar;
qabul qilingan normativ-huquqiy va boshqa hujjatlar;
hujjatlarning ijro etilishi haqidagi ma’lumotlar;
hujjatlarga kiritilgan o‘zgartishlar va ularning o‘z kuchini yo‘qotgani haqidagi ma’lumotlar;
davlat dasturlari, tanlovlar va kimoshdi savdolari haqidagi axborot;
bo‘sh ish o‘rinlari va ishga qabul qilish shartlari;
ariza, taklif, shikoyat va axborot so‘rovlarini qabul qilish tartibi;
davlat organining ish tartibi, manzili va aloqa ma’lumotlari kiradi.

Foydalanilishi qonun bilan cheklangan axborot, davlat sirlari va shaxsga doir ma’lumotlar umumiy tartibda oshkor etilmaydi.

Ochiqlikni ta’minlash usullari

Davlat organlari ochiqlikni:

rasmiy nashrlar;
rasmiy veb-saytlar;
ommaviy axborot vositalari;
axborot xizmatlarining xabarlari;
matbuot anjumanlari va brifinglar;
ochiq hay’at majlislari;
axborot stendlari;
og‘zaki, yozma yoki elektron so‘rovlarga javob berish orqali ta’minlaydi.

Muhim: davlat organining rasmiy veb-saytidagi axborotga sana qo‘yilishi va u kamida haftasiga bir marta yangilanishi kerak. Rasmiy veb-saytdagi axborot ishonchli bo‘lishi va davlat tilida joylashtirilishi shart.

Axborot so‘rovini yuborish

Axborot so‘rovi davlat organiga yoki uning mansabdor shaxsiga:

og‘zaki;
yozma;
elektron hujjat shaklida yuborilishi mumkin.

Jismoniy shaxs so‘rovida familiyasi, ismi, otasining ismi, yashash joyi va so‘rovning mazmunini ko‘rsatadi. Yuridik shaxs so‘rovida uning to‘liq nomi, pochta manzili va so‘rov mazmuni bayon etiladi.

Foydalanuvchini aniqlash imkonini bermaydigan anonim so‘rov ko‘rib chiqilmaydi.

So‘rovni ko‘rib chiqish muddatlari

Axborotdan foydalanuvchining so‘rovi ro‘yxatdan o‘tkazilgan kundan boshlab ko‘pi bilan 15 kun ichida ko‘rib chiqiladi.

OAVning davlat organi faoliyati haqida axborot olish yoki mansabdor shaxs intervьyusini tashkil etish to‘g‘risidagi so‘rovi ko‘pi bilan 7 kun ichida ko‘rib chiqiladi.

Agar so‘rovni ko‘rib chiqish organ vakolatiga kirmasa, u tegishli vakolatli organga 3 ish kuni ichida yuboriladi va foydalanuvchi bu haqda xabardor qilinadi.

So‘rov rad etilsa, foydalanuvchiga rad etish sabablari ko‘rsatilgan asoslantirilgan javob yuborilishi shart.

Shikoyat qilish

Axborot berilmasa, muddat buzilsa yoki asossiz rad javobi berilsa, foydalanuvchi:

yuqori turuvchi davlat organiga;
prokuratura organlariga;
sudga shikoyat qilishi mumkin.
«Davlat hokimiyati va boshqaruvi organlari faoliyatining ochiqligi to‘g‘risida»gi Qonun
O‘zbekiston Respublikasi Konstitutsiyasi