Majburiy avtosug‘urta summasi va sug‘urta mukofoti

Sug‘urta summasi

Majburiy avtosug‘urta shartnomasi bo‘yicha bir sug‘urta hodisasi uchun umumiy sug‘urta summasi — 80 million so‘m.

U quyidagicha taqsimlanadi:

jabrlanuvchining mol-mulkiga etkazilgan zarar uchun — sug‘urta summasining 35 foizigacha, ya’ni 28 million so‘mgacha;
jabrlanuvchining hayoti yoki sog‘lig‘iga etkazilgan zarar uchun — sug‘urta summasining 65 foizigacha, ya’ni 52 million so‘mgacha.

Muhim: 80 million so‘m har bir jabrlanuvchiga avtomatik ravishda to‘lanadigan summa emas. Tovon amalda etkazilgan va hujjatlar bilan tasdiqlangan zarar miqdorida, belgilangan limitlar doirasida to‘lanadi.

Bir nechta jabrlanuvchi bo‘lsa va ularning umumiy talabi tegishli limitdan oshsa, sug‘urta tovoni zarar miqdoriga mutanosib ravishda taqsimlanadi.

Sug‘urta mukofoti qanday hisoblanadi

Sug‘urta summasi — sug‘urtalovchi javobgar bo‘lgan eng yuqori limit.

Sug‘urta mukofoti — polisni rasmiylashtirish uchun transport vositasi egasi to‘laydigan mablag‘.

Mukofotni hisoblashda:

transport vositasining turi;
uni ro‘yxatdan o‘tkazish hududi;
cheklangan yoki cheklanmagan polis tanlanganligi;
haydovchilarning yoshi va staji;
oldingi 12 oyda aybdor sifatida sodir etilgan sug‘urta hodisalari;
mavsumiy foydalanish va boshqa belgilangan koeffitsientlar hisobga olinadi.

Yillik bazaviy stavkalar

2026-yildan yillik bazaviy stavka sug‘urta summasiga nisbatan:

engil avtomobillar uchun — 0,2 foiz;
yuk avtomobillari uchun — 0,35 foiz;
avtobus va mikroavtobuslar uchun — 0,4 foiz;
mototsikl, motoroller, tramvay, traktor va boshqa belgilangan mashinalar uchun — 0,075 foiz.

Hudud koeffitsienti:

Toshkent shahri va Toshkent viloyatida — 1,2;
boshqa hududlarda — 1,0;
O‘zbekistonda vaqtincha foydalanilayotgan xorijiy transport uchun — 2,0.

Cheklanmagan polis uchun qo‘shimcha 2,0 koeffitsient qo‘llanadi.

Oldingi 12 oyda haydovchi aybdor bo‘lgan sug‘urta hodisalari mavjud bo‘lsa:

bitta hodisa uchun — 1,3;
ikkita hodisa uchun — 2,0;
uchta va undan ko‘p hodisa uchun — 3,0 koeffitsient qo‘llanadi.

Oddiy hisob-kitob namunasi

Boshqa koeffitsientlar 1,0 bo‘lgan engil avtomobilь uchun bazaviy yillik mukofot:

boshqa hududlarda — 160 000 so‘m;
Toshkent shahri yoki Toshkent viloyatida — 192 000 so‘m.

Cheklanmagan polis tanlansa, ushbu hisobga 2,0 koeffitsient qo‘llanadi:

boshqa hududlarda — 320 000 so‘m;
Toshkent shahri yoki Toshkent viloyatida — 384 000 so‘m.

Haydovchining staji, yoshi, qoidabuzarliklari yoki sug‘urta hodisalari mavjud bo‘lsa, yakuniy summa farq qilishi mumkin.

Sug‘urta qildiruvchi sug‘urtalovchidan mukofotning yozma yoki elektron hisob-kitobini talab qilishga haqli. Zarur ma’lumotlar mavjud bo‘lsa, hisob-kitob 2 ish kuni ichida berilishi kerak.

Imtiyozlar

Qonunchilikda belgilangan ayrim toifadagi shaxslarga sug‘urta mukofotining 50 foizi miqdorida siylov beriladi. Imtiyozdan foydalanish uchun uni tasdiqlovchi hujjat taqdim etiladi yoki tegishli ma’lumot elektron tizim orqali tekshiriladi.

Sug‘urta summasi va tariflar Vazirlar Mahkamasining 2025-yil 23-iyuldagi 458-son qarori hamda 2008-yil 24-iyundagi 141-son qaror bilan tasdiqlangan Qoidalar asosida belgilanadi.