Avtomobilь qaysi asoslarda to‘xtatilishi mumkin?

Yo‘l-patrulь xizmati xodimi transport vositasini faqat qonunchilikda belgilangan asoslar mavjud bo‘lganda to‘xtatishi mumkin. Bunday asoslarga, jumladan:

• haydovchining Yo‘l harakati qoidalarini buzgani vizual kuzatuvda aniqlanganda yoki maxsus moslama orqali qayd etilganda;
• transport vositasi, haydovchi yoki yo‘lovchi qidiruvda ekani yoki YTH yoxud boshqa huquqbuzarlikka aloqadorligi haqida ma’lumot mavjud bo‘lganda;
• YTH yoki huquqbuzarlikni ko‘rgan haydovchi yoki yo‘lovchidan holatga oydinlik kiritish zarur bo‘lganda;
• vakolatli organ yoki mansabdor shaxsning harakatni cheklash yoki taqiqlash haqidagi ko‘rsatmasi bajarilayotganda;
• qonunchilikda belgilangan hollarda transport vositasidan foydalanish zarurati tug‘ilganda;
• maxsus tadbir o‘tkazilayotganda;
• transport vositasini boshqarish va undan foydalanish huquqini beruvchi hujjatlar, transport vositasi yoki tashilayotgan yukka oid hujjatlar mavjudligini tekshirish zarur bo‘lganda kiradi.

Boshqa asoslarga ko‘ra transport vositasini to‘xtatish taqiqlanadi.

YPX xodimi to‘xtatgandan keyin nima qilishi kerak?

Transport vositasi to‘xtatilgandan keyin YPX xodimi haydovchining oldiga borib:

• o‘zini tanishtirishi;
• lavozimi, unvoni va familiyasini aytishi;
• talab qilinsa, ko‘krak nishon belgisini ma’lum qilishi;
• xizmat guvohnomasini ochiq holda ko‘rsatishi;
• transport vositasi nima sababdan to‘xtatilganini aniq va tushunarli bayon qilishi kerak. Xizmat guvohnomasi ko‘rsatiladi, lekin haydovchining qo‘liga berilishi shart emas.

YPX xodimi xizmat vazifalarini mobilь videokameradan foydalangan holda oshkora olib borishi hamda yo‘l harakati qatnashchisiga videokameradan foydalanayotganini ma’lum qilishi shart.

Haydovchi avtomobildan tushishi shartmi?

Qoida tariqasida, haydovchi YPX xodimi bilan transport vositasi kabinasidan chiqmasdan muloqot qilish huquqiga ega.

Biroq Nizomda nazarda tutilgan ayrim hollarda, masalan transport vositasidagi texnik nosozlikni bartaraf etish, mastlikka asosli shubha bo‘lishi, dvigatelь yoki agregat raqamlarini solishtirish, hujjatlar yoki yukni tekshirish zarurati, haydovchi yoki yo‘lovchi jinoyat sodir etganlikda gumon qilinishi kabi holatlarda haydovchidan transport vositasidan chiqish talab qilinishi mumkin.

«Maxsus tadbir» deb to‘xtatilsa, uni tekshirish mumkinmi?

Ha. Maxsus tadbir doirasida transport vositasi to‘xtatilganda YPX xodimi tadbir qanday maqsadda o‘tkazilayotgani va to‘xtatish sababini tushuntirishi kerak.

Haydovchi maxsus tadbir haqiqatan tasdiqlangan reja asosida o‘tkazilayotganini DYHXXning axborot-dispetcherlik xizmati orqali yoki xodim xizmat olib borayotgan saf bo‘limi rahbariga murojaat qilib tekshirishi mumkin. Talab qilinganda YPX xodimi tegishli dispetcherlik xizmati telefon raqamini berishi kerak.

Bunda maxsus tadbirning shartli nomi, to‘liq mazmuni, ko‘lami va uni o‘tkazishga asos bo‘lgan xizmat hujjatlari fuqaroga ko‘rsatilmaydi.

Haydovchi muloqotni videoga olishi mumkinmi?

Ha. Yo‘l harakati qatnashchisi YPX xodimi bilan muloqotini o‘zining audio, foto va video qurilmalariga qayd etish huquqiga ega.

Foto va video tasvirga olish taqiqlangan maxsus belgi mavjud hududlar bundan mustasno.

Shuningdek, haydovchi:

• nima sababdan to‘xtatilgani va qaysi qoida buzilganini tushuntirishni;
• xodimning xizmat guvohnomasi va ko‘krak nishon belgisini ko‘rsatishni;
• maxsus moslamada qayd etilgan qoidabuzarlik natijasini ko‘rsatishni;
• tegishli maxsus moslamaning qiyoslash sertifikatini ko‘rsatishni talab qilish huquqiga ega.

Eslatma: YPX xodimi transport vositasini to‘xtatganda haydovchi to‘xtatish sababini bilish huquqiga ega. Nizomda ko‘rsatilmagan boshqa sabab bilan transport vositasini to‘xtatishga yo‘l qo‘yilmaydi.