Avtomototransport vositasining egasi yoki uning vakili mulk huquqi yuzaga kelgan yoki boshqa shaxsga o‘tgan kundan boshlab 10 kun ichida avtomobilni davlat ro‘yxatidan yoki qayta ro‘yxatdan o‘tkazish uchun Yo‘l harakati xavfsizligi xizmati bo‘linmasiga murojaat qilishi kerak.

2026-yil 31-avgustga qadar hisob-kitoblar amaldagi bazaviy hisoblash miqdori — 412 000 so‘m asosida keltirilgan.

Yangi oddiy avtomobilni birlamchi ro‘yxatdan o‘tkazish

Elektromobilь, gibrid avtomobilь, mototransport vositasi va tirkamalar jumlasiga kirmaydigan benzin, dizelь yoki boshqa turdagi avtomobilni birlamchi ro‘yxatdan o‘tkazishda quyidagi to‘lovlar undiriladi:

• davlat ro‘yxatidan o‘tkazish — 6,84 BHM, ya’ni 2 818 080 so‘m;
• transport vositasi ro‘yxatdan o‘tkazilganligi to‘g‘risidagi guvohnomani — texpasportni berish — 0,7 BHM, ya’ni 288 400 so‘m;
• oddiy ro‘yxatdan o‘tkazish davlat raqami belgisini berish — 3,5 BHM, ya’ni 1 442 000 so‘m.

Jami — 4 548 480 so‘m.

Muhim! 1 442 000 so‘m miqdoridagi to‘lov avtomobilь egasi harf va raqamlar kombinatsiyasini mustaqil tanlamagan holda, oddiy tartibda beriladigan davlat raqamiga taalluqli.

Ushbu summaga davlat raqamini mustaqil tanlash, YHXX xodimining manzilga chiqishi va boshqa qo‘shimcha xizmatlar kiritilmagan.

Elektromobilь yoki gibrid avtomobilni birlamchi ro‘yxatdan o‘tkazish

Elektromobilь va gibrid avtomobillarni birlamchi ro‘yxatdan o‘tkazish uchun alohida stavka belgilangan:

• davlat ro‘yxatidan o‘tkazish — 1,5 BHM, ya’ni 618 000 so‘m;
• texpasport berish — 0,7 BHM, ya’ni 288 400 so‘m;
• oddiy davlat raqamini berish — 3,5 BHM, ya’ni 1 442 000 so‘m.

Jami — 2 348 400 so‘m.

Mazkur to‘lov stavkalari ichki ishlar vazirining 2011-yil 23-noyabrdagi 174-son buyrug‘i bilan tasdiqlangan, 2303-son bilan davlat ro‘yxatidan o‘tkazilgan to‘lov stavkalarida belgilangan.

«Avtoraqam» tizimi orqali davlat raqamini tanlash

Harf va raqamlarning istalgan kombinatsiyasiga ega bo‘lgan davlat raqamini elektron shaklda quyidagilar orqali tanlash mumkin:

• YHXXning mobilь ilovasi;
• YHXXning rasmiy veb-sayti;
• Yagona interaktiv davlat xizmatlari portali;
• ro‘yxatdan o‘tkazish va imtihon olish bo‘linmalaridagi infokiosklar.

Mustaqil tanlangan raqam kombinatsiyasi uchun oddiy raqamga belgilangan 3,5 BHM miqdoridagi to‘lov emas, balki yagona oshirilgan to‘lov undiriladi. Uning miqdori «Uzavtomotobelgi» davlat unitar korxonasi tomonidan belgilanadi.

Shu sababli «Avtoraqam» ilovasida davlat raqamining narxi 4 mln so‘m yoki undan yuqori ko‘rsatilishi mumkin. Bu 3,5 BHMlik to‘lovga zid emas. Chunki ilovada oddiy tartibda beriladigan raqamning emas, balki fuqaro tomonidan mustaqil tanlangan kombinatsiyaning narxi ko‘rsatiladi.

Muhim! Davlat raqami «Avtoraqam» tizimi orqali tanlanganda umumiy xarajatlarni hisoblashda oddiy raqamning narxi o‘rniga elektron tizimda ko‘rsatilgan oshirilgan narx hisobga olinadi. Avtomobilni ro‘yxatdan yoki qayta ro‘yxatdan o‘tkazish va texpasport berish uchun to‘lovlar alohida to‘lanadi.

Tanlangan raqam kombinatsiyasi avtomatlashtirilgan tizimda band qilinadi. Invoys shakllantirilganidan keyin jismoniy shaxsga to‘lovni amalga oshirish uchun har biri 20 daqiqagacha bo‘lgan ikkita imkoniyat beriladi. To‘lov integratsiyalashgan elektron to‘lov tizimi orqali onlayn amalga oshiriladi.

Davlat raqamini tanlash tartibi va yagona oshirilgan to‘lov Vazirlar Mahkamasining 2017-yil 31-avgustdagi 683-son qarorida belgilangan.

Oltitagacha harf va (yoki) raqamlar kombinatsiyasidan iborat bo‘lgan «noyob» davlat raqamlari ochiq elektron savdolar orqali berilishi mumkin.

Yangi avtomobilni notariusda rasmiylashtirish

Yangi avtomobilь rasmiy dilerdan oldi-sotdi shartnomasi yoki elektron hisob-ma’lumotnoma asosida xarid qilinganda bitimni alohida notarial tasdiqlash, qoida tariqasida, talab etilmaydi.

Xaridor quyidagi xarajatlarni to‘laydi:

• avtomobilni davlat ro‘yxatidan o‘tkazish;
• texpasport olish;
• oddiy yoki mustaqil tanlangan davlat raqamini olish.

Ishlatilgan avtomobilni notariusda rasmiylashtirish

Ishlatilgan avtomobilь jismoniy shaxsdan xarid qilinganda oldi-sotdi shartnomasi notarial tasdiqlanadi.

Avtomototransport vositasini boshqa shaxsga o‘tkazish shartnomasini tasdiqlash uchun davlat boji:

• 3 BHM;
• amaldagi BHM 412 000 so‘m bo‘lganda — 1 236 000 so‘mni tashkil etadi.

Mazkur stavka O‘zbekiston Respublikasining «Davlat boji to‘g‘risida»gi Qonunida belgilangan.

Bundan tashqari, amalda ko‘rsatilgan huquqiy va texnik xususiyatga ega qo‘shimcha xizmatlar uchun to‘lovlar undirilishi mumkin. Jumladan:

• shartnoma loyihasini tayyorlash;
• taqiq yoki xatlov mavjudligini tekshirish;
• huquqiy maslahat berish;
• elektron so‘rovlar yuborish;
• gerbli blank tayyorlash.

Keltirilgan qo‘shimcha xizmatlar saqlanganda taxminiy hisob-kitob quyidagicha bo‘ladi:

• davlat boji — 1 236 000 so‘m;
• gerbli blank yoki tegishli texnik to‘lov — 41 200 so‘m;
• taqiq va xatlov mavjudligini tekshirish — 61 800 so‘m;
• huquqiy maslahat — 20 600 so‘m;
• shartnoma loyihasini tayyorlash — 41 200 so‘m.

Notarial rasmiylashtirishning taxminiy qiymati — 1 400 800 so‘m.

Yakuniy summa bitimning mazmuni, taraflar o‘rtasidagi qarindoshlik, mavjud imtiyozlar va notarius tomonidan amalda ko‘rsatilgan xizmatlar ro‘yxatiga qarab farq qilishi mumkin.

Ishlatilgan avtomobilni YHXXda qayta ro‘yxatdan o‘tkazish

Ishlatilgan avtomobilning mulk huquqi boshqa shaxsga o‘tganda birlamchi ro‘yxatdan o‘tkazish emas, balki qayta ro‘yxatdan o‘tkazish amalga oshiriladi.

Bunda quyidagi to‘lovlar undiriladi:

• avtomobilni qayta ro‘yxatdan o‘tkazish — 0,1 BHM, ya’ni 41 200 so‘m;
• yangi texpasport berish — 0,7 BHM, ya’ni 288 400 so‘m;
• yangi oddiy davlat raqami talab etilganda — 3,5 BHM, ya’ni 1 442 000 so‘m.

Yangi oddiy davlat raqami olinganda YHXXdagi jami xarajatlar 1 771 600 so‘mni tashkil etadi.

Agar avvalgi davlat raqami belgilangan tartibda saqlab qolinsa va yangi raqam olish talab etilmasa, xarajatlar 329 600 so‘mni tashkil etadi.

Muhim! 6,84 BHM stavkasi oddiy avtomobilni birlamchi davlat ro‘yxatidan o‘tkazishga nisbatan qo‘llaniladi. Ilgari ro‘yxatdan o‘tkazilgan avtomobilni qayta ro‘yxatdan o‘tkazish uchun 0,1 BHM undiriladi.

Ishlatilgan avtomobilni xarid qilishdagi umumiy xarajatlar

Ishlatilgan avtomobilь boshqa jismoniy shaxsdan xarid qilinib, yangi oddiy davlat raqami olinsa:

• notarial rasmiylashtirish — taxminan 1 400 800 so‘m;
• qayta ro‘yxatdan o‘tkazish, texpasport va yangi oddiy davlat raqami — 1 771 600 so‘m.

Umumiy taxminiy xarajatlar — 3 172 400 so‘m.

Agar avvalgi davlat raqami saqlab qolinsa:

• notarial rasmiylashtirish — taxminan 1 400 800 so‘m;
• qayta ro‘yxatdan o‘tkazish va yangi texpasport — 329 600 so‘m.

Umumiy taxminiy xarajatlar — 1 730 400 so‘m.

Agar xaridor davlat raqamini «Avtoraqam» tizimi orqali tanlasa, yakuniy summa tanlangan kombinatsiyaning tizimda ko‘rsatilgan oshirilgan narxi hisobga olingan holda aniqlanadi.

Notarial rasmiylashtirishdagi imtiyozlar

Avtomobilь quyidagi shaxslarga o‘tkazilganda:

• eri yoki xotiniga;
• o‘zining ota-onasiga yoki erining (xotinining) ota-onasiga;
• farzandlari va ularning er-xotiniga;
• nabiralariga;
• buvasi yoki buvisiga;
• aka-ukasi yoki opa-singlisiga davlat boji belgilangan stavkaning 5 foizi miqdorida undiriladi.

Avtomobilь bank krediti hisobiga xarid qilinganda davlat boji belgilangan stavkaning 10 foizi miqdorida undiriladi.

2026-yil 1 sentyabrdan summalarning o‘zgarishi

Prezidentning 2026-yil 23-iyundagi PF–115-son Farmoniga muvofiq, 2026-yil 1 sentyabrdan BHM 440 000 so‘m etib belgilanadi.

Shu sanadan boshlab:

• oddiy davlat raqami bilan yangi oddiy avtomobilni birlamchi ro‘yxatdan o‘tkazish — 4 857 600 so‘m;
• oddiy davlat raqami bilan elektromobilь yoki gibrid avtomobilni birlamchi ro‘yxatdan o‘tkazish — 2 508 000 so‘m;
• ishlatilgan avtomobilni yangi oddiy davlat raqami bilan qayta ro‘yxatdan o‘tkazish — 1 892 000 so‘m;
• avvalgi davlat raqami saqlab qolinganda qayta ro‘yxatdan o‘tkazish — 352 000 so‘m;
• shartnomani notarial tasdiqlash uchun davlat boji — 1 320 000 so‘m bo‘ladi.

Mustaqil tanlanadigan davlat raqamining qiymati «Avtoraqam» tizimida ko‘rsatilgan narx asosida aniqlanadi.