Avtomototransport vositasini boshqarish huquqini boshqa shaxsga berish

Elektron ishonchnomani rasmiylashtirish

Jismoniy shaxs o‘ziga tegishli avtomototransport vositasini boshqarish huquqini boshqa shaxsga Yagona interaktiv davlat xizmatlari portali orqali elektron ishonchnoma rasmiylashtirish yo‘li bilan berishi mumkin.

Ariza beruvchi portaldan ro‘yxatdan o‘tib, elektron so‘rovnomani to‘ldiradi. Unda:

transport vositasi mulkdori haqidagi ma’lumotlar;
transport vositasining ro‘yxatdan o‘tkazish guvohnomasi va davlat raqami;
ishonchnoma berilayotgan shaxslarning pasport yoki ID-karta ma’lumotlari va JShShIRi;
ishonchnomaning amal qilish muddati;
transport vositasini O‘zbekiston hududidan tashqariga olib chiqish huquqi berilishi yoki berilmasligi ko‘rsatiladi.

Ariza beruvchi so‘rovnomada ko‘rsatilgan transport vositasining mulkdori bo‘lmasa, ishonchnoma rasmiylashtirilmaydi. Ishonchnoma kiritiladigan shaxslar soniga cheklov belgilanmagan.

Ishonchnomaning muddati

Elektron ishonchnoma ariza beruvchining tanloviga ko‘ra:

1 oygacha;
1 oydan ortiq, 6 oygacha;
6 oydan ortiq, 3 yilgacha bo‘lgan muddatga rasmiylashtiriladi.

Ishonchnomaning muddatini uzaytirish mumkin emas. Muddat tugagach, zarurat bo‘lsa yangi ishonchnoma rasmiylashtiriladi.

Davlat boji

Elektron ishonchnoma uchun davlat boji notarial ishonchnoma uchun belgilangan stavkaga nisbatan:

1 oygacha — 10 foiz;
1 oydan ortiq 6 oygacha — 50 foiz;
6 oydan ortiq 3 yilgacha — 100 foiz miqdorida undiriladi.

Notarial ishonchnoma uchun asosiy stavka yaqin qarindoshlarga BHMning 50 foizi, boshqa shaxslarga BHMning 2 baravari miqdorida belgilangan. To‘lanadigan aniq summa ishonchnoma muddati va ishonchli shaxsning mulkdorga qarindoshlik darajasi asosida portal tomonidan hisoblanadi.

I va II guruh nogironligi bo‘lgan shaxslarga davlat bojini to‘lashda 50 foiz chegirma qo‘llaniladi.

Ishonchnomaning yuridik kuchi

Davlat boji to‘langanidan keyin ishonchnoma «Notarius» axborot tizimida ro‘yxatga olinadi. QR-kodli ishonchnoma real vaqt rejimida shakllantirilib, ariza beruvchining shaxsiy kabinetiga yuboriladi.

Elektron shaklda rasmiylashtirilgan QR-kodli ishonchnoma notarial tasdiqlangan ishonchnoma bilan bir xil yuridik kuchga ega.

Ishonchnoma haqidagi ma’lumotlar Ichki ishlar vazirligining yagona avtomatlashtirilgan axborot tizimiga ham avtomatik yuboriladi. Haydovchi xohishiga ko‘ra ishonchnoma nusxasini YHXX xodimiga ko‘rsatishi mumkin.

Ishonchnomani bekor qilish

Mulkdor ishonchnomani istalgan vaqtda va to‘lovsiz YaIDXP orqali bekor qilishi mumkin.

Ishonchnoma quyidagi hollarda ham bekor bo‘ladi:

amal qilish muddati tugaganda;
ishonchnoma beruvchi uni bekor qilganda;
ishonchnoma beruvchi yoki ishonchli shaxs muomalaga layoqatsiz, muomala layoqati cheklangan yoki bedarak yo‘qolgan deb topilganda yoxud vafot etganda;
transport vositasining mulkdori o‘zgarganda.

Ishonchnoma muddatidan oldin bekor qilinsa yoki takroriy ishonchnoma rasmiylashtirilsa, avval to‘langan davlat boji qaytarilmaydi.

Normativ hujjatlar

Maqola foydali bo‘ldimi?

Bo‘limlar