Автомототранспорт воситасини бошқариш ҳуқуқини бошқа шахсга бериш

Электрон ишончномани расмийлаштириш

Жисмоний шахс ўзига тегишли автомототранспорт воситасини бошқариш ҳуқуқини бошқа шахсга Ягона интерактив давлат хизматлари портали орқали электрон ишончнома расмийлаштириш йўли билан бериши мумкин.

Ариза берувчи порталдан рўйхатдан ўтиб, электрон сўровномани тўлдиради. Унда:

транспорт воситаси мулкдори ҳақидаги маълумотлар;
транспорт воситасининг рўйхатдан ўтказиш гувоҳномаси ва давлат рақами;
ишончнома берилаётган шахсларнинг паспорт ёки ID-карта маълумотлари ва ЖШШИРи;
ишончноманинг амал қилиш муддати;
транспорт воситасини Ўзбекистон ҳудудидан ташқарига олиб чиқиш ҳуқуқи берилиши ёки берилмаслиги кўрсатилади.

Ариза берувчи сўровномада кўрсатилган транспорт воситасининг мулкдори бўлмаса, ишончнома расмийлаштирилмайди. Ишончнома киритиладиган шахслар сонига чеклов белгиланмаган.

Ишончноманинг муддати

Электрон ишончнома ариза берувчининг танловига кўра:

1 ойгача;
1 ойдан ортиқ, 6 ойгача;
6 ойдан ортиқ, 3 йилгача бўлган муддатга расмийлаштирилади.

Ишончноманинг муддатини узайтириш мумкин эмас. Муддат тугагач, зарурат бўлса янги ишончнома расмийлаштирилади.

Давлат божи

Электрон ишончнома учун давлат божи нотариал ишончнома учун белгиланган ставкага нисбатан:

1 ойгача — 10 фоиз;
1 ойдан ортиқ 6 ойгача — 50 фоиз;
6 ойдан ортиқ 3 йилгача — 100 фоиз миқдорида ундирилади.

Нотариал ишончнома учун асосий ставка яқин қариндошларга БҲМнинг 50 фоизи, бошқа шахсларга БҲМнинг 2 баравари миқдорида белгиланган. Тўланадиган аниқ сумма ишончнома муддати ва ишончли шахснинг мулкдорга қариндошлик даражаси асосида портал томонидан ҳисобланади.

I ва II гуруҳ ногиронлиги бўлган шахсларга давлат божини тўлашда 50 фоиз чегирма қўлланилади.

Ишончноманинг юридик кучи

Давлат божи тўланганидан кейин ишончнома «Notarius» ахборот тизимида рўйхатга олинади. QR-кодли ишончнома реал вақт режимида шакллантирилиб, ариза берувчининг шахсий кабинетига юборилади.

Электрон шаклда расмийлаштирилган QR-кодли ишончнома нотариал тасдиқланган ишончнома билан бир хил юридик кучга эга.

Ишончнома ҳақидаги маълумотлар Ички ишлар вазирлигининг ягона автоматлаштирилган ахборот тизимига ҳам автоматик юборилади. Ҳайдовчи хоҳишига кўра ишончнома нусхасини ЙҲХХ ходимига кўрсатиши мумкин.

Ишончномани бекор қилиш

Мулкдор ишончномани исталган вақтда ва тўловсиз ЯИДХП орқали бекор қилиши мумкин.

Ишончнома қуйидаги ҳолларда ҳам бекор бўлади:

амал қилиш муддати тугаганда;
ишончнома берувчи уни бекор қилганда;
ишончнома берувчи ёки ишончли шахс муомалага лаёқатсиз, муомала лаёқати чекланган ёки бедарак йўқолган деб топилганда ёхуд вафот этганда;
транспорт воситасининг мулкдори ўзгарганда.

Ишончнома муддатидан олдин бекор қилинса ёки такрорий ишончнома расмийлаштирилса, аввал тўланган давлат божи қайтарилмайди.