Xalq deputatlari Kengashi huzuridagi ekspert guruhi faoliyatini tashkil etish

Ekspert guruhi nima?

Ekspert guruhi — mahalliy Kengash va uning doimiy komissiyalari faoliyatini ekspert, tahliliy va axborot-maslahat jihatidan ta’minlash uchun jamoatchilik asosida tashkil etiladigan maslahat organi.

Ekspert guruhlari Senat Kengashining 2025-yil 28-yanvardagi KQ-52-V-son qarori bilan tasdiqlangan Namunaviy nizom asosida tashkil etiladi. Mahalliy Kengashlar ushbu Namunaviy nizom asosida o‘z nizomlarini tasdiqlaydi.

Ekspert guruhining asosiy vazifalari

Ekspert guruhi:

Kengash va doimiy komissiyalar ko‘rib chiqadigan masalalarni o‘rganadi;
Kengash qarorlari loyihalari yuzasidan ekspert xulosasi va takliflar tayyorlaydi;
hududiy dasturlar va loyihalarning huquqiy, iqtisodiy hamda ijtimoiy oqibatlarini baholaydi;
norma ijodkorligi faoliyatiga ko‘maklashadi;
nazorat-tahlil tadbirlarini tayyorlash va o‘tkazishda ishtirok etadi;
mansabdor shaxslarning hisobotlarini eshitishga doir materiallarni tahlil qiladi;
qonunchilikdagi o‘zgarishlar haqida deputatlarga axborot beradi;
muammolarni hal etish bo‘yicha amaliy tavsiyalar ishlab chiqadi.

Ekspert guruhi mahalliy Kengash va uning komissiyalariga maslahat va tahliliy ko‘mak ko‘rsatadi, ammo ularning o‘rniga qaror qabul qilmaydi.

Ekspert guruhi qanday tuziladi?

Ekspert guruhi tegishli mahalliy Kengash qarori bilan tuziladi.

Uning tarkibiga:

deputatlar;
huquq, iqtisodiyot, moliya va boshqa sohalar mutaxassislari;
olimlar va ta’lim muassasalari vakillari;
nodavlat notijorat tashkilotlari va fuqarolik jamiyati institutlari vakillari;
mustaqil ekspertlar kiritilishi mumkin.

Guruh a’zolari o‘z faoliyatini, qoida tariqasida, jamoatchilik asosida amalga oshiradi.

Guruh ishiga kim rahbarlik qiladi?

Ekspert guruhi raisi:

guruh ishini tashkil etadi;
yig‘ilishlarni chaqiradi;
vazifalarni a’zolar o‘rtasida taqsimlaydi;
tayyorlangan xulosa va takliflarni Kengashga taqdim etadi;
Kengash va doimiy komissiyalar bilan hamkorlikni ta’minlaydi.

Rais bo‘lmagan vaqtda uning vazifasini belgilangan a’zo bajaradi.

Yig‘ilishlar qanday o‘tkaziladi?

Yig‘ilishlar zaruratga qarab chaqiriladi.

Yig‘ilishga:

Kengash deputatlari;
davlat organlari va tashkilotlari vakillari;
olimlar;
soha mutaxassislari;
jamoatchilik va OAV vakillari taklif etilishi mumkin.

Ko‘rib chiqilgan masalalar bo‘yicha ekspert xulosasi, tavsiya yoki taklif tayyorlanadi.

Ekspert xulosasi majburiymi?

Ekspert xulosasi — o‘rganilgan masala yoki qaror loyihasi yuzasidan mutaxassislar tomonidan tayyorlangan asoslantirilgan fikr va tavsiyalar.

Ekspert guruhining xulosalari tavsiyaviy xususiyatga ega.

Yakuniy qaror tegishli mahalliy Kengash yoki uning vakolatli doimiy komissiyasi tomonidan qabul qilinadi.

Manfaatlar to‘qnashuvi bo‘lsa nima qilinadi?

Ekspert ko‘rib chiqilayotgan masalada shaxsiy yoki mulkiy manfaatdor bo‘lsa, bu haqda guruh rahbariga ma’lum qilishi va masalani ko‘rib chiqish hamda xulosa tayyorlashda ishtirok etmasligi kerak.

Ekspertlar xizmat va qonun bilan muhofaza qilinadigan boshqa sirlarni oshkor qilmasligi shart.

Normativ hujjatlar

Senat Kengashining 2025-yil 28-yanvardagi KQ-52-V-son qarori

Maqola foydali bo‘ldimi?

Bo‘limlar