Yo‘l harakati qoidalarini buzgan piyodalarga qanday javobgarlik belgilangan?

O‘zbekiston Respublikasining Ma’muriy javobgarlik to‘g‘risidagi kodeksining 138-moddasiga ko‘ra, piyodalar hamda yo‘l harakatining ayrim boshqa ishtirokchilari yo‘l harakati qoidalarini buzgan taqdirda ma’muriy javobgarlikka tortiladi.

Qonunga muvofiq, quyidagi holatlar huquqbuzarlik hisoblanadi:

— svetofor yoki harakatni tartibga soluvchining signallariga bo‘ysunmaslik;

— yo‘lning qatnov qismini belgilanmagan joydan kesib o‘tish;

— piyodalar yo‘lni kesib o‘tayotganda yoki qatnov qismida harakatlanayotganda telefondan foydalanish;

— kitob yoki gazeta-jurnallarni o‘qish;

— videomateriallarni tomosha qilish yoki audiomateriallarni tinglash;

— e’tiborni chalg‘itadigan boshqa elektron vositalardan foydalanish;

— skuter, moped, velosiped, individual harakatlanish vositalari hamda ulovli aravalarni boshqarayotgan shaxslarning svetofor signallari yoki yo‘l belgilari talablariga rioya qilmasligi.

Mazkur qoidabuzarliklar uchun ma’muriy ogohlantirish yoki bazaviy hisoblash miqdorining uchdan bir qismi miqdorida jarima belgilangan.

Shuningdek, haydovchilarga turli xizmatlar ko‘rsatish maqsadida yo‘lning qatnov qismida turish yoki yo‘llarga ajratilgan mintaqalar atrofida mol boqish ma’muriy ogohlantirish yoki bazaviy hisoblash miqdorining yarmi miqdorida jarima qo‘llanilishiga sabab bo‘ladi.

Agar ushbu qoidabuzarliklar natijasida avariya holati yuzaga kelsa, huquqbuzarga bazaviy hisoblash miqdorining bir barobari miqdorida jarima solinadi.

Bundan tashqari, transport vositasi harakatlanayotgan vaqtda yo‘lovchining qo‘ldan tashqari boshqa tana qismlarini salondan tashqariga chiqarishi ham huquqbuzarlik hisoblanadi va buning uchun bazaviy hisoblash miqdorining bir barobari miqdorida jarima belgilangan.

Qonunchilikda skuter, moped, velosiped, individual harakatlanish vositalari hamda ulovli aravalarni boshqaruvchi shaxslar uchun ham alohida talablar nazarda tutilgan. Jumladan, ushbu vositalarni belgilangan tartibda nur qaytargichlar va chiroqlarsiz boshqarish, shuningdek, individual harakatlanish vositalari va skuterlarda odam tashish uchun bazaviy hisoblash miqdorining yarmi miqdorida jarima qo‘llaniladi.

Shuningdek, skuter, moped, velosiped, individual harakatlanish vositasi yoki ulovli aravani alkogolli ichimlik, giyohvandlik moddasi ta’sirida yoki boshqacha tarzda mast holda boshqarib yo‘l harakati qoidalarini buzish eng og‘ir huquqbuzarliklardan biri hisoblanadi. Bu holat uchun bazaviy hisoblash miqdorining uch barobari miqdorida jarima nazarda tutilgan.

Yo‘l harakati qoidalariga rioya qilish nafaqat haydovchilar, balki piyodalar, yo‘lovchilar hamda harakatning boshqa barcha ishtirokchilari uchun ham majburiydir. Ushbu talablarga amal qilish yo‘l-transport hodisalarining oldini olish va har bir fuqaroning xavfsizligini ta’minlashga xizmat qiladi.

Maqola foydali bo‘ldimi?

Bo‘limlar