Hayvonlar, parrandalar, arilar va o‘simliklarni poezdda tashish

Kichik uy hayvonlari va parrandalar

Kichik uy hayvonlari va parrandalarni:

veterinariya qoidalarida taqiqlanmagan bo‘lsa;
veterinariya ma’lumotnomasi mavjud bo‘lsa;
qafas, quti, savat yoki boshqa mos idishda;
vagon va boshqa yo‘lovchilar buyumlarini ifloslantirmaydigan tarzda tashish mumkin.

Tashish belgilangan tarif bo‘yicha rasmiylashtiriladi. Shahar atrofi poezdlaridan tashqari hollarda yo‘lovchiga «Yo‘lovchining qo‘lidagi bagaj» qaydi bilan bagaj kvitantsiyasi beriladi.

Itlarni tashish

Yirik, shu jumladan xizmat itlari veterinariya ma’lumotnomasi bilan:

bagaj vagonida maxsus konteynerda;
lokomotivdan keyingi birinchi platskart vagonning ishlatilmaydigan tamburida — 2 tagacha;
shahar atrofi poezdi tamburida — 2 tagacha;
to‘liq chipta olingan yoki kupening barcha joylari sotib olingan holda tashilishi mumkin.

Qafas yoki boshqa idishda bo‘lmagan it tumshuqbog‘ va tasmada bo‘lishi shart.

Muhim: ko‘zi ojiz shaxsning yo‘l boshlovchi iti barcha vagonlarda uning yonida bepul tashiladi.

Bir guruh itlarni tashish uchun poezd jo‘nashidan kamida 5 sutka oldin tashuvchiga buyurtmanoma berilishi kerak. Bunday tashish alohida vagonda ijara asosida amalga oshiriladi.

Bagaj vagonida tashish

Itlar, parrandalar, kichik hayvonlar va arilar bagaj vagoniga poezd jo‘nashidan ko‘pi bilan 3 soat oldin qabul qilinadi.

Ular manzil stantsiyasida poezd kelganidan keyin 12 soatdan kechiktirmay olib ketilishi kerak.

Hayvonlarni boqish va parvarishlash ularning egasi yoki hamrohlik qiluvchi shaxs zimmasiga yuklatiladi.

Yovvoyi hayvonlar, kemiruvchilar, katta va kichik shoxli chorva hamda otlarni yo‘lovchi poezdlarida tashish taqiqlanadi.

Arilarni tashish

Arilar bagaj vagonida tashqi havo harorati +10°C dan yuqori bo‘lmaganda qabul qilinadi.

Ular ari uyasi yoki fanerli paketda, shu poezdda ketayotgan kuzatuvchi nazoratida tashiladi. Uyalarning shamollatish teshiklari to‘sib qo‘yilmasligi kerak.

Ko‘chatlar va o‘simliklar

O‘simlik, ko‘chat va boshqa ekish materiallari:

ularning saqlanishini ta’minlaydigan o‘ramda;
boshqa bagajni ifloslantirmaydigan holda;
har bir joyi 25 kilogrammdan;
balandligi 2 metrdan oshmagan holda qabul qilinadi.

Karantin e’lon qilingan hududdagi stantsiyadan jo‘natilayotganda tegishli karantin hujjati taqdim etilishi shart.

Tartib Vazirlar Mahkamasining 2012-yil 13-apreldagi 109-son qarori bilan belgilangan.

Maqola foydali bo‘ldimi?

Bo‘limlar