Bagaj yoki yuk bagaj kechiktirilganda jarima undirish

Jarima miqdori

Temir yo‘l bagaj yoki yuk bagajni belgilangan muddatdan kechiktirib etkazsa, har bir kechiktirilgan sutka uchun jarima to‘laydi. To‘liq bo‘lmagan sutka ham to‘liq sutka hisoblanadi.

Jarima:

bagaj uchun — tashish haqining har bir kechikkan sutka uchun 5 foizi, biroq umumiy hisobda tashish haqining 50 foizidan ko‘p bo‘lmagan miqdorda;
yuk bagaj uchun — tashish haqining har bir kechikkan sutka uchun 1,5 foizi, biroq umumiy hisobda tashish haqining 30 foizidan ko‘p bo‘lmagan miqdorda to‘lanadi.

Jarima bagajning qiymatidan emas, uni tashish uchun to‘langan haqdan hisoblanadi.

Masalan, bagajni tashish haqi 100 000 so‘m bo‘lsa va u 3 sutka kechiksa, jarima 15 000 so‘mni tashkil etadi. Bunda jarima 50 000 so‘mdan oshmaydi.

Kechikishni tasdiqlash

Bagaj kechikib etkazilganda yo‘lovchi stantsiyadan kechikish holatini tasdiqlovchi dalolatnoma olishi kerak.

Talabnomaga, qoida tariqasida:

bagaj kvitantsiyasi;
yo‘lovchi chiptasi;
kechikish haqida temir yo‘l bergan dalolatnoma;
shaxsni tasdiqlovchi hujjat nusxasi;
tashish haqi to‘langanini tasdiqlovchi ma’lumot;
bank rekvizitlari ilova qilinadi.

Talabnoma berish

Jarima avtomatik ravishda to‘lanmaydi. Yo‘lovchi temir yo‘l rahbari yoki talabnomalarni ko‘rib chiqish vakolati berilgan hududiy tuzilmaga yozma talabnoma taqdim etadi.

Talabnomada:

bagaj kvitantsiyasining ma’lumotlari;
jo‘nash va manzil stantsiyalari;
belgilangan va haqiqiy etkazib berish sanasi;
kechikkan sutkalar soni;
hisoblangan jarima miqdori;
pulni o‘tkazish rekvizitlari ko‘rsatiladi.

Jarima undirish haqidagi talabnoma 45 kun ichida berilishi kerak. Muddat bagaj yoki yuk bagaj berilgan kundan hisoblanadi.

Temir yo‘l jarima to‘lash haqidagi talabnomani kelib tushgan kundan boshlab 45 kun ichida ko‘rib chiqishi va natijasi haqida murojaat qiluvchiga xabar berishi shart.

Temir yo‘lning javobgarligi

Temir yo‘l kechikish o‘z aybi bilan sodir bo‘lmaganini isbotlasa, javobgarlikdan ozod etilishi mumkin. Kechikish sababini asoslash majburiyati tashuvchi zimmasida bo‘ladi.

Bagaj va yuk bagajni kechiktirib etkazganlik uchun jarima to‘lash tartibi Vazirlar Mahkamasining 2008-yil 23-oktabrdagi 232-son qarori bilan tasdiqlangan Temir yo‘l ustavida belgilangan.

Maqola foydali bo‘ldimi?

Bo‘limlar