Voyaga etgan mehnatga layoqatsiz shaxslarning ta’minot talab qilish huquqi

Voyaga etgan bola ota-onasidan aliment talab qilishi mumkinmi?

Mehnatga layoqatsiz va yordamga muhtoj voyaga etgan bola o‘z ota-onasidan ta’minot talab qilish huquqiga ega. Agar ota-onasi bo‘lmasa, qonunda belgilangan shartlarda qarindoshlari va Oila kodeksida ko‘rsatilgan boshqa shaxslardan ham aliment talab qilishi mumkin.

Bunday aliment miqdori sud tomonidan aliment to‘lashi shart bo‘lgan shaxsning moddiy va oilaviy ahvoli hisobga olinib, qat’iy pul summasida belgilanishi mumkin.

Faqat voyaga etganlik aliment olish uchun etarli emas. Shaxs mehnatga layoqatsiz va yordamga muhtoj bo‘lishi kerak.

Bobo, buvi va nevaralar qachon ta’minot berishi mumkin?

Ota-onasi yo‘q yoki ulardan ta’minot ololmaydigan voyaga etmagan nevaralarga etarli mablag‘ga ega bobo va buvi ta’minot berishi mumkin.

Voyaga etgan mehnatga layoqatsiz va yordamga muhtoj nevara ota-onasi, eri yoki xotini, sobiq eri yoki xotini hamda voyaga etgan mehnatga layoqatli bolalaridan ta’minot ololmasa, bobo va buvidan ta’minot talab qilinishi mumkin.

Shuningdek, mehnatga layoqatsiz va yordamga muhtoj bobo yoki buvi o‘zining voyaga etgan bolalari yoki eri (xotini), shu jumladan sobiq eri yoki xotinidan ta’minot ololmasa, etarli mablag‘ga ega voyaga etgan mehnatga layoqatli nevaralar zimmasiga ta’minot berish majburiyati yuklatilishi mumkin.

Aka-uka va opa-singillar o‘rtasidagi majburiyat

Ota-onasi yo‘q yoki ulardan ta’minot ololmaydigan voyaga etmagan aka-uka yoki opa-singilga etarli mablag‘ga ega aka-uka va opa-singillardan ta’minot undirilishi mumkin.

Voyaga etgan mehnatga layoqatsiz va yordamga muhtoj aka-uka yoki opa-singil ota-onasi, eri yoki xotini, sobiq eri yoki xotini hamda voyaga etgan mehnatga layoqatli bolalaridan ta’minot ololmasa, etarli mablag‘ga ega aka-uka va opa-singillar zimmasiga ham bunday majburiyat yuklatilishi mumkin.

Doimiy tarbiyachilarga ta’minot berish qachon talab qilinishi mumkin?

Mehnatga layoqatsiz va yordamga muhtoj, eri yoki xotini, sobiq eri yoki xotini yoxud voyaga etgan mehnatga layoqatli bolalaridan ta’minot ololmaydigan shaxsni amalda tarbiyalagan bo‘lsa, uning doimiy tarbiyasi va ta’minotida bo‘lgan shaxs zimmasiga ta’minot berish majburiyati yuklatilishi mumkin.

Bu majburiyat vasiylik yoki homiylikda turgan shaxslarga yuklatilmaydi. Agar shaxs tarbiyachining tarbiyasi va ta’minotida 5 yildan kam turgan bo‘lsa, sud uni ta’minot berish majburiyatidan ozod qilishi mumkin.

O‘gay ota-ona va o‘gay farzandlar o‘rtasidagi majburiyat

Agar voyaga etmagan o‘gay o‘g‘il yoki o‘gay qizning ota-onasi bo‘lmasa yoki ulardan etarli mablag‘ ololmasa, qonunda belgilangan hollarda ularni tarbiyalagan yoki ta’minlagan o‘gay ota va o‘gay ona zimmasiga ta’minot berish majburiyati yuklatilishi mumkin.

Mehnatga layoqatsiz va yordamga muhtoj o‘gay ota yoki o‘gay ona o‘z yaqinlaridan ta’minot ololmasa, voyaga etgan mehnatga layoqatli o‘gay o‘g‘il yoki o‘gay qizdan ta’minot talab qilinishi mumkin. Agar o‘gay ota yoki o‘gay ona ularni 5 yildan kam tarbiyalagan va ta’minlagan bo‘lsa yoki o‘z majburiyatlarini lozim darajada bajarmagan bo‘lsa, sud o‘gay farzandni bu majburiyatdan ozod qilishga haqli.

Aliment miqdori qanday belgilanadi?

Qarindoshlar va boshqa shaxslardan undiriladigan aliment miqdori sud tomonidan taraflarning moddiy va oilaviy ahvoli hisobga olinib, har oyda to‘lanadigan qat’iy pul summasida belgilanadi.

Sud talab faqat bir shaxsga nisbatan qo‘yilgan bo‘lsa ham, qonun bo‘yicha ta’minot berishi mumkin bo‘lgan boshqa shaxslarni ham hisobga oladi.