Sayt test rejimida ishlamoqda

Huquqiy axborot - hammaga, har doim, hamma joyda!

  • 1665 marta o'qildi

Davlat ijtimoiy sug‘urtasi bo‘yicha fuqarolarga quyidagi nafaqalar beriladi:

Homiladorlik va tug‘ish nafaqasi
  • Homiladorlik va tug‘ish nafaqasi (shu jumladan, homila tushgan hollarda) 126 kun uchun (tug‘ish qiyin kechgan yoki ikki va undan ortiq bola tug‘ilgan hollarda — 140 kun) muddatga to‘lanadi.
  • Homiladorlik va tug‘ish bo‘yicha nafaqani tayinlash va to‘lash uchun ish (o‘qish) joyiga mehnatga layoqatsizlik varaqasini taqdim etish lozim.
  • Vaqtincha mehnatga layoqatsizlik varaqasi yo‘qolgan hollarda nafaqa uning o‘rniga takroriy berilgan vaqtincha mehnatga layoqatsizlik varaqasi (dublikat) asosida beriladi.
  • Homiladorlik va tug‘ish bo‘yicha nafaqa ish haqining (stipendiya) 100 foizi miqdorida beriladi.
  • Nafaqa, ayol ta’tilga ketgunga qadar to‘lanadi. Agar ketgunga qadar olinmagan bo‘lsa, homiladorlik va tug‘ish ta’tili tugagan kundan boshlab 6 oy muddat ichida murojaat qilish lozim. Ushbu muddat o‘tgandan keyin nafaqa to‘lanmaydi.

Bola tug‘ilgani uchun beriladigan nafaqa (suyunchi puli)

Bola tug‘ilganda bir yo‘la beriladigan nafaqa (suyunchi puli) bazaviy hisoblash miqdorining 2 baravarini tashkil etadi.

Mazkur nafaqa:

  • ishlayotgan ayollarga – ish joyidan;
  • ta’lim olayotgan ayollarga – o‘qish joyidan;
  • o‘qimaydigan va ishlamaydigan ayollarga – eri ishlaydigan yoki o‘qiydigan joyidan;
  • o‘qimaydigan va ishlamaydigan ota-onalarga – Pensiya jamg‘armasi tomonidan to‘lanadi.
  • Davlat xizmatlari markazlari yoki O‘zbekiston Respublikasi Yagona interaktiv davlat xizmatlari portali orqali bola tug‘ilgan kundan boshlab 6 oy muddat ichida murojaat qilingan taqdirda O‘zbekiston Respublikasi Moliya vazirligi huzuridagi byudjetdan tashqari Pensiya jamg‘armasi tomonidan ko‘rsatiladi va nafaqa puli nafaqa etkazib berish (topshirish) yuklangan tashkilot tomonidan to‘lanadi.

Nafaqani olish uchun FHDYo bo‘limi tomonidan berilgan bolaning tug‘ilganlik haqidagi ma’lumotnomasini topshirishi lozim. Mazkur ma’lumotnoma FHDYo bo‘limi tomonidan tug‘ilganlik haqidagi guvohnoma bilan birga taqdim etiladi. Nafaqa olinishi uchun ma’lumotnoma nafaqani to‘lovchi organga 6 oy ichida topshirilishi kerak. Ushbu muddat o‘tgandan keyin nafaqa to‘lanmaydi. FHDYo bo‘limlari haqida ma’lumot olish uchun havolaga o‘ting.

  • Agar ma’lumotnoma yo‘qotib qo‘yilsa, ish, o‘qish joyidan nafaqa olinmaganligi to‘g‘risidagi ma’lumotnomaga asosan FHDYo bo‘limidan takroran ma’lumotnoma olish lozim bo‘ladi.
  • O‘lik bola tug‘ilgan xollarda nafaqa to‘lanmaydi.

Qo‘shimcha dam olish kuni uchun beriladigan nafaqa

Nogiron bolasini tarbiyalayotgan ishlovchi ota-onaning biriga (vasiyga, homiyga) bola o‘n olti yoshga to‘lgunga qadar davlat ijtimoiy sug‘urtasi mablag‘lari hisobidan bir kunlik ish haqi miqdorida haq to‘lagan holda oyiga qo‘shimcha bir dam olish kuni beriladi.

Dafn etish marosimi uchun beriladigan nafaqa

Vafot etgan shaxsni dafn etish uchun uni qarindoshlariga, ular bo‘lmaganda esa dafn etishni amalga oshirish majburiyatini o‘z zimmasiga olgan boshqa shaxsga nafaqa to‘lanadi. Nafaqa Pensiya jamg‘armasi yoki ishxona tomonidan to‘lanadi.

Nafaqa miqdori bazaviy hisoblash miqdorining 3 baravarini tashkil etadi. Nafaqani olish uchun o‘lim qayd etilgan kundan boshlab 6 oy ichida murojaat qilish kerak. Ushbu muddat o‘tgandan keyin nafaqa to‘lanmaydi.

► Davlat xizmatlari markazlari yoki O‘zbekiston Respublikasi Yagona interaktiv davlat xizmatlari portali orqali O‘zbekiston Respublikasi Moliya vazirligi huzuridagi byudjetdan tashqari Pensiya jamg‘armasi tomonidan ko‘rsatiladi va nafaqa puli nafaqa etkazib berish (topshirish) yuklangan tashkilot tomonidan to‘lanadi.

Nafaqa olish uchun quyidagi hujjatlar topshirilishi lozim

a) pensiya jamg‘armasiga:

  • o‘lim to‘g‘risidagi guvohnoma nusxasi va o‘lim to‘g‘risidagi ma’lumotnomaning asl nusxasi. O‘lik bola tug‘ilganda perinatal o‘lim to‘g‘risidagi ma’lumotnomaning asl nusxasi;
  • ariza beruvchining pasporti nusxasi.

b) ishxonaga:

  • ariza;
  • o‘lim guvohnomasi;
  • marhumning xodim bilan qarindoshligi darajasini tasdiqlaydigan hujjat (xodimning qaramog‘idagi oila a’zosi vafot etgan taqdirda).

Nafaqa hujjatlar to‘liq taqdim etilgan kuni to‘lanadi.

Nafaqa quyidagi hollarda Pensiya jamg‘armasining tuman (shahar) bo‘limlari tomonidan tayinlanadi
  • davlat pensiyasi oluvchi pensioner;
  • davlat ijtimoiy nafaqasi oluvchi fuqaro;
  • bola hayotining birinchi haftasi mobaynida yoki o‘lik bola tug‘ilganda (perinatal o‘lim);
  • to‘liq davlat ta’minotidagi shaxslar («Mehribonlik», «Saxovat», «Muruvvat» uylaridagi, jazoni o‘tash joylarida va h.k.) jismoniy shaxslar  vafot etganda.

Hududiy pensiya jamg‘armasi bo‘limlari haqida ma’lumot olish uchun ushbu havolaga o‘ting.

Ishlab turgan xodim yoki uning oila a’zosi vafot etganda nafaqa u ishlab turgan tashkilot tomonidan to‘lanadi. 

Bunda, nafaqa xodim yoki uning qaramog‘ida bo‘lgan quyidagi oila a’zolari vafot etganda beriladi
  • turmush o‘rtog‘i;
  • 18 yoshga to‘lmagan yoki vaqtincha mehnatga qobiliyatsiz (yoshidan qat’i nazar) bolalari, aka-ukalari va opa-singillari;
  • ota-onasi;
  • bobosi yoki buvisi.

Yashash uchun mustaqil mablag‘ manbaiga ega bo‘lgan oila a’zolari qaramog‘ida turgan deb hisoblanmaydi.


Dafn marosimi uchun nafaqa tayinlash bo‘yicha davlat xizmatlari ko‘rsatish sxemasi

Chat