Gaz ta’minotiga oid masalalar

Tabiiy gazni hisobga olish

Iste’molchilarga tabiiy gazni uning hajmini hisobga olmasdan etkazib berishga yo‘l qo‘yilmaydi.

Gaz hajmini hisoblash uchun:

O‘zbekiston Respublikasi O‘lchov vositalari davlat reestriga kiritilgan;
foydalanishga yaroqliligi tasdiqlangan;
amal qiluvchi plomba va belgilari mavjud hisoblagichdan foydalanilishi kerak.

Tabiiy gazni hisobga olishning avtomatlashtirilgan tizimiga ulangan hisoblagich ma’lumotlari gaz ta’minoti tashkilotining elektron dasturiga onlayn tarzda yuboriladi.

Hisoblagichni ko‘zdan kechirish

Maishiy iste’molchining hisoblagichi, ichki gaz tarmog‘i va gaz uskunalarini oddiy tekshirish soat 08:00 dan 20:00 gacha amalga oshiriladi. Vakolatli xodim o‘z xizmat guvohnomasini ko‘rsatishi kerak.

Avariya yoki gaz sizib chiqishi bilan bog‘liq favqulodda holatlarda vakolatli xodimlarning xonalarga kirishi kunning istalgan vaqtida ta’minlanishi lozim.

Tekshiruv natijalari bo‘yicha dalolatnoma rasmiylashtiriladi. Unda:

aniqlangan holat;
hisoblagich ko‘rsatkichlari;
plombalarning holati;
qoidabuzarlik bo‘lsa, uning mazmuni;
iste’molchining tushuntirishi qayd etiladi.

Tekshirishga yo‘l qo‘yilmasa

Iste’molchi hisoblagich va gaz uskunalarini ko‘zdan kechirishga imkoniyat bermasa, bu haqda dalolatnoma tuziladi.

Iste’molchi dalolatnomani imzolashni rad etsa:

rad etish holati dalolatnomada ko‘rsatiladi;
holat ikki guvoh, mahalla vakili yoki foto-video dalillar bilan tasdiqlanadi;
iste’molchi rad etish sababini yozma bayon qilishga haqli.

Muhim: vakolatli xodimlarni tekshiruvga qo‘ymaslik va tegishli dalolatnomani imzolashdan asossiz bosh tortish gaz ta’minotidan uzib qo‘yishga asos bo‘lishi mumkin.

Gaz hajmi qachon qayta hisoblanadi

Quyidagi holatlar aniqlanganda iste’mol qilingan gaz hajmi qonunchilikda belgilangan davr uchun qayta hisoblanadi:

hisoblagich yoki masofadan o‘chirib-yoqish klapaniga qasddan shikast etkazilganda;
hisoblagich, gaz uskunasi yoki o‘chirish qurilmasidagi plomba buzilganda;
gaz hisoblagichdan tashqari foydalanilganda;
hisoblagichning ulanish sxemasi o‘zboshimchalik bilan o‘zgartirilganda;
yashirin gaz quvuri, baypas yoki boshqa noqonuniy ulanish o‘rnatilganda;
hisoblagich konfiguratsiyasi, ichki qismi yoki xotirasiga ruxsatsiz aralashilganda;
gaz tarmog‘ining texnologik ish rejimini buzuvchi qurilma o‘rnatilganda.

Qayta hisoblash davri qoidabuzarlik turiga qarab oxirgi haqiqiy ma’lumot, oxirgi ko‘rik, xatlov yoki qiyoslov sanasidan boshlab belgilanadi.

Materialdagi qoidalar Vazirlar Mahkamasining 319-son qarori bilan tasdiqlangan Tabiiy gazdan foydalanish qoidalariga asoslanadi.