Газ таъминотига оид масалалар

Табиий газни ҳисобга олиш

Истеъмолчиларга табиий газни унинг ҳажмини ҳисобга олмасдан етказиб беришга йўл қўйилмайди.

Газ ҳажмини ҳисоблаш учун:

Ўзбекистон Республикаси Ўлчов воситалари давлат реестрига киритилган;
фойдаланишга яроқлилиги тасдиқланган;
амал қилувчи пломба ва белгилари мавжуд ҳисоблагичдан фойдаланилиши керак.

Табиий газни ҳисобга олишнинг автоматлаштирилган тизимига уланган ҳисоблагич маълумотлари газ таъминоти ташкилотининг электрон дастурига онлайн тарзда юборилади.

Ҳисоблагични кўздан кечириш

Маиший истеъмолчининг ҳисоблагичи, ички газ тармоғи ва газ ускуналарини оддий текшириш соат 08:00 дан 20:00 гача амалга оширилади. Ваколатли ходим ўз хизмат гувоҳномасини кўрсатиши керак.

Авария ёки газ сизиб чиқиши билан боғлиқ фавқулодда ҳолатларда ваколатли ходимларнинг хоналарга кириши куннинг исталган вақтида таъминланиши лозим.

Текширув натижалари бўйича далолатнома расмийлаштирилади. Унда:

аниқланган ҳолат;
ҳисоблагич кўрсаткичлари;
пломбаларнинг ҳолати;
қоидабузарлик бўлса, унинг мазмуни;
истеъмолчининг тушунтириши қайд этилади.

Текширишга йўл қўйилмаса

Истеъмолчи ҳисоблагич ва газ ускуналарини кўздан кечиришга имконият бермаса, бу ҳақда далолатнома тузилади.

Истеъмолчи далолатномани имзолашни рад этса:

рад этиш ҳолати далолатномада кўрсатилади;
ҳолат икки гувоҳ, маҳалла вакили ёки фото-видео далиллар билан тасдиқланади;
истеъмолчи рад этиш сабабини ёзма баён қилишга ҳақли.

Муҳим: ваколатли ходимларни текширувга қўймаслик ва тегишли далолатномани имзолашдан асоссиз бош тортиш газ таъминотидан узиб қўйишга асос бўлиши мумкин.

Газ ҳажми қачон қайта ҳисобланади

Қуйидаги ҳолатлар аниқланганда истеъмол қилинган газ ҳажми қонунчиликда белгиланган давр учун қайта ҳисобланади:

ҳисоблагич ёки масофадан ўчириб-ёқиш клапанига қасддан шикаст етказилганда;
ҳисоблагич, газ ускунаси ёки ўчириш қурилмасидаги пломба бузилганда;
газ ҳисоблагичдан ташқари фойдаланилганда;
ҳисоблагичнинг уланиш схемаси ўзбошимчалик билан ўзгартирилганда;
яширин газ қувури, байпас ёки бошқа ноқонуний уланиш ўрнатилганда;
ҳисоблагич конфигурацияси, ички қисми ёки хотирасига рухсатсиз аралашилганда;
газ тармоғининг технологик иш режимини бузувчи қурилма ўрнатилганда.

Қайта ҳисоблаш даври қоидабузарлик турига қараб охирги ҳақиқий маълумот, охирги кўрик, хатлов ёки қиёслов санасидан бошлаб белгиланади.

Материалдаги қоидалар Вазирлар Маҳкамасининг 319-сон қарори билан тасдиқланган Табиий газдан фойдаланиш қоидаларига асосланади.