Ijro xatlari yozish

Ijro xatining mazmuni

Ijro xati — notarius tomonidan qarzdordan pul undirish yoki mol-mulkni talab qilib olish uchun qarzdorlikni tasdiqlovchi hujjatga qo‘yiladigan ijro yozuvidir.

Ijro xati sud muhokamasisiz beriladi, biroq faqat qarzdorlik shubhasiz va hujjatlar bilan to‘liq tasdiqlangan hollarda qo‘llaniladi.

Muhim: taraflar o‘rtasida qarzning mavjudligi, miqdori yoki majburiyatning bajarilganligi yuzasidan nizo bo‘lsa, masala sud tartibida hal qilinishi lozim.

Ijro xati beriladigan shartlar

«Notariat to‘g‘risida»gi Qonunga ko‘ra, ijro xati:

taqdim etilgan hujjatlar qarzdorlik yoki boshqa majburiyatning shubhasizligini tasdiqlasa;
talab qilish huquqi vujudga kelgan kundan boshlab uch yildan ortiq vaqt o‘tmagan bo‘lsa yoziladi.

Agar muayyan talab uchun qonunchilikda boshqa muddat belgilangan bo‘lsa, ijro xati shu muddat doirasida beriladi.

Undirishga asos bo‘ladigan hujjatlar

Ijro xati faqat Vazirlar Mahkamasining 26-son qarori bilan tasdiqlangan ro‘yxatdagi hujjatlar bo‘yicha beriladi.

Ular qatoriga, jumladan:

pul olish, mol-mulkni qaytarish yoki berish bilan bog‘liq notarial tasdiqlangan bitimlar;
kreditlar bo‘yicha qarzdor va kafillarning muddati o‘tgan qarzdorligini tasdiqlovchi hujjatlar;
garov va ayrim boshqa ta’minlangan majburiyatlar;
telekommunikatsiya xizmatlari bo‘yicha ayrim qarzdorliklar;
maktabgacha ta’lim va ixtisoslashtirilgan maktablarda bolalar ta’minoti uchun to‘lov qarzdorligi;
ro‘yxatda bevosita nazarda tutilgan boshqa hujjatlar kiradi.

Notarial bitim bo‘yicha ijro xati

Pul olish, mulkni qaytarish yoki berish bilan bog‘liq notarial tasdiqlangan bitim bo‘yicha, odatda:

notarial tasdiqlangan bitimning asl nusxasi;
kreditorning qarzdorga notarius orqali yuborgan, to‘lov muddati o‘tganligi yoki mol-mulk qaytarilmagani haqidagi yozma bildirishnomasi;
qarzdorlik miqdorini tasdiqlovchi hisob-kitob va boshqa hujjatlar taqdim etiladi.

Kreditor talab qilayotgan summa asosiy qarz, foiz, penya va boshqa to‘lovlar kesimida aniq hisoblangan bo‘lishi kerak.

Kredit shartnomasi bo‘yicha hujjatlar

Kredit qarzdorligi bo‘yicha:

kredit shartnomasining asl nusxasi;
qarzdorning shaxsiy hisobvarag‘idan qarz miqdori ko‘rsatilgan ko‘chirma;
qarzdorga yuborilgan talabnoma;
qonunchilikda nazarda tutilgan boshqa hujjatlar taqdim etiladi.

Notarius kredit shartnomasidan nusxa olib, uning aslini undiruvchiga qaytarishi mumkin.

Notariusning tekshiruvi

Notarius:

ariza beruvchining vakolatini;
hujjatlarning haqiqiyligi va etarliligini;
qarzning hisob-kitobini;
talab muddati o‘tmaganini;
qarzdorga bildirishnoma yuborilganini;
qarz yuzasidan nizo mavjud emasligini tekshiradi.

Talab ro‘yxatga kirmasa, hujjatlar qarzning shubhasizligini tasdiqlamasa yoki taraflar o‘rtasida nizo mavjud bo‘lsa, notarius ijro xati berishni rad etadi.

Ijro xatini ijro etish

Ijro xati ijro hujjati hisoblanadi va undiruvchi uni qonunchilikda belgilangan tartibda Majburiy ijro byurosiga taqdim etishi mumkin.

Qarzdor ijro xatini yoki notariusning harakatini noto‘g‘ri deb hisoblasa, notarial idora joylashgan erdagi sudga shikoyat qilishga haqli.

To‘lovlar

«Davlat boji to‘g‘risida»gi Qonunga ko‘ra, ijro xati uchun undiriladigan summaning 1 foizi, biroq ko‘pi bilan 10 BHM miqdorida davlat boji undiriladi.

Qarz shartnomasidan kelib chiqadigan pul summasini undirish haqida ijro xati berilganda belgilangan stavkaning 50 foizi undiriladi. Qo‘shimcha huquqiy va texnik xizmatlar alohida to‘lanishi mumkin.