O‘zbekiston Respublikasi Oliy Majlisining Bola huquqlari bo‘yicha vakili (Bolalar ombudsmani)

Bolalar ombudsmanining maqomi

Bola huquqlari bo‘yicha vakil — bolalarning huquqlari, erkinliklari va qonuniy manfaatlarini himoya qilishga ko‘maklashuvchi mustaqil mansabdor shaxs.

U o‘z vakolatlarini davlat organlari va mansabdor shaxslarga tobe bo‘lmagan holda amalga oshiradi hamda Oliy Majlis palatalariga hisobdordir.

Bolalar ombudsmani mavjud sud, prokuratura, vasiylik va homiylik organlari hamda boshqa himoya vositalarini almashtirmaydi, balki ularni to‘ldiradi.

Asosiy vazifalari

Bolalar ombudsmani:

bolalar huquqlari to‘g‘risidagi qonunchilikka rioya etilishini o‘rganadi;
bolalar huquqlarini himoya qilishga oid murojaatlarni ko‘rib chiqadi;
qonunchilikni takomillashtirish bo‘yicha takliflar kiritadi;
bolalar huquqlari sohasida huquqiy madaniyatni oshirishga ko‘maklashadi;
bola huquqlari buzilgan holatlarni o‘z tashabbusi bilan tekshirishi mumkin;
davlat organlari va tashkilotlarga qonunbuzilishlarni bartaraf etish haqida taqdimnoma kiritadi;
aybdor shaxslarni javobgarlikka tortish to‘g‘risida vakolatli organlarga iltimosnoma kiritadi;
bola manfaatlarini ko‘zlab sudga davlat bojini to‘lamasdan ariza yoki da’vo kiritishi mumkin.

Kimlar murojaat qilishi mumkin?

Bolalar ombudsmaniga:

O‘zbekiston fuqarolari;
O‘zbekiston hududida turgan chet el fuqarolari;
fuqaroligi bo‘lmagan shaxslar;
yuridik shaxslar;
bolaning qonuniy vakillari;
bolaning o‘zi murojaat qilishi mumkin.

Bola to‘liq muomala layoqatiga ega emasligi sababli uning shikoyatini ko‘rib chiqmasdan qoldirish mumkin emas.

Bolaning o‘zi bergan shikoyat Bolalar ombudsmani tomonidan ko‘rib chiqilishi shart. Shikoyat uchun davlat boji undirilmaydi.

Shikoyat berish tartibi

Shikoyat og‘zaki, yozma yoki elektron shaklda berilishi mumkin. Unda murojaat qiluvchi haqidagi ma’lumotlar, huquqni buzgan tashkilot yoki mansabdor shaxs va nizoli harakat yoki harakatsizlikning mazmuni ko‘rsatiladi.

Shikoyat huquq buzilganligi ma’lum bo‘lgan kundan yoki boshqa himoya vositalari qo‘llanilgan bo‘lsa, oxirgi qaror qabul qilingan kundan boshlab bir yil ichida beriladi. Uzrli sabab bo‘lganda o‘tkazib yuborilgan muddat tiklanishi mumkin.

Anonim murojaatlar va bevosita sud vakolatiga kiradigan masalalar Bolalar ombudsmani tomonidan ko‘rib chiqilmaydi.

Tekshiruv o‘tkazish vakolatlari

Shikoyatni tekshirishda Bolalar ombudsmani tashkilotlardan hujjat va ma’lumotlar talab qilishi, mansabdor shaxslardan tushuntirish olishi, tashkilotlarga moneliksiz kirishi hamda mutaxassislarni jalb qilishi mumkin.

U bolalar o‘z xohishi bilan chiqib keta olmaydigan muassasalarni monitoring qiladi, bolalar bilan xoli suhbat o‘tkazishi va qonunga xilof harakatlarni to‘xtatish choralarini ko‘rishi mumkin.

Material «O‘zbekiston Respublikasi Oliy Majlisining Bola huquqlari bo‘yicha vakili (Bolalar ombudsmani) to‘g‘risida»gi Qonun asosida tayyorlandi.

Maqola foydali bo‘ldimi?

Bo‘limlar