Jamoa kelishuvi

Jamoa kelishuvi — muayyan kasb, tarmoq, hudud xodimlari uchun mehnat shartlari, ish bilan ta’minlash va ijtimoiy kafolatlar belgilash borasidagi majburiyatlar belgilangan normativ hujjatdir.

Jamoa kelishuvida quyidagilar nazarda tutilishi mumkin:

mehnatga haq to‘lash, mehnat shartlari va uni muhofaza qilish, mehnat va dam olish tartibi;
narxlarning o‘zgarib borishiga, inflyatsiya darajasiga qarab mehnatga haq to‘lashni tartibga solish mexanizmi;
eng kam miqdori qonun hujjatlarida nazarda tutiladigan kompensatsiya tarzidagi qo‘shimcha to‘lovlar;
xodimlarning ishga joylashishiga, ularni qayta o‘qitishga ko‘maklashish;
ekologik xavfsizlikni ta’minlash hamda xodimlarning sog‘lig‘ini muhofaza qilish;
xodimlar hamda ularning oila a’zolarini ijtimoiy himoya qilish;
nogironligi bo‘lgan shaxslar va yoshlar (shu jumladan o‘n sakkiz yoshga to‘lmaganlar) uchun qo‘shimcha ish joylari tashkil etuvchi korxonalarga beriladigan imtiyozlar;
ijtimoiy sheriklik hamda 3 taraflama hamkorlikni rivojlantirish, jamoa shartnomalarini tuzishga ko‘maklashish, mehnat nizolarining oldini olish, mehnat intizomini mustahkamlash to‘g‘risidagi qoidalar.