Issiqlik ta’minoti tarmoqlariga ulash

Texnik shart va loyiha talab qilinmaydigan holatlar

Texnik shart, issiqlik ta’minoti loyihasini ishlab chiqish va kelishish quyidagi hollarda talab etilmaydi:

maishiy iste’molchilarning xonadonlari va shaxsiy uy-joylari uchun;
ko‘chmas mulk ob’ekti bo‘yicha avval berilgan texnik shart mavjud bo‘lib, ob’ekt boshqa shaxsga o‘tkazilganda;
fuqaroning familiyasi, ismi yoki otasining ismi o‘zgarganda;
yuridik shaxsning tashkiliy-huquqiy shakli yoki firma nomi o‘zgarganda;
issiqlik iste’moli hajmi o‘zgarmasdan faoliyat turi o‘zgarganda.

Bunday hollarda faqat hisobga olish tizimini o‘rnatish, plombalash va issiqlik ta’minoti shartnomasini tuzish uchun murojaat qilinadi.

Issiqlik energiyasini issiqlik ta’minoti shartnomasini tuzmasdan etkazib berish taqiqlanadi.

Texnik shartlarni olish

Iste’molchi DXM yoki YaIDXP orqali so‘rovnoma yuboradi. Issiqlik ta’minoti korxonasi QR-kodli texnik shartlarni 3 ish kuni ichida ishlab chiqadi.

Ulanish yoki mavjud issiqlik yuklamasini oshirishning texnik imkoniyati mavjud emasligi rad etish uchun asos bo‘ladi. Boshqa asoslar bo‘yicha rad etish taqiqlanadi.

Loyihani ishlab chiqish va kelishish

Iste’molchi loyiha ishlarini bajarish uchun issiqlik ta’minoti korxonasi yoki boshqa loyihalash tashkiloti bilan shartnoma tuzishi mumkin.

Tayyorlangan elektron loyiha DXM yoki YaIDXP orqali kelishishga yuboriladi. Issiqlik ta’minoti korxonasi loyihani 3 ish kuni ichida ko‘rib chiqib, QR-kodli xulosa beradi.

Loyiha texnik shartlardan chetga chiqqan bo‘lsa, kelishish rad etilishi mumkin. Kamchiliklar bartaraf etilgandan keyin takroriy kelishish 1 ish kunidan oshmagan muddatda amalga oshiriladi.

Qurilish va texnik ko‘rik

Qurilish-montaj va sozlash-ishga tushirish ishlari issiqlik ta’minoti korxonasi yoki boshqa tegishli tashkilot bilan tuzilgan shartnoma asosida bajariladi.

Ishlar yakunlangandan keyin DXM yoki YaIDXP orqali texnik ko‘rik uchun so‘rovnoma yuboriladi. So‘rovnoma avtomatik ravishda O‘zenergoinspektsiyaga kelib tushadi.

O‘zenergoinspektsiya:

ob’ektga chiqib, ishlarning texnik shart va normativ talablarga muvofiqligini tekshiradi;
tayyorlangan issiqlik-texnik xodimlar mavjudligini o‘rganadi;
qurilmalarning ekspluatatsiyaga tayyorligi yoki tayyor emasligi haqida QR-kodli dalolatnoma rasmiylashtiradi.

Texnik ko‘rik muddati — 2 ish kuni. Kamchiliklar bartaraf etilgandan keyin qayta ko‘rik 1 ish kuni ichida o‘tkaziladi.

Plombalash va shartnoma tuzish

Issiqlik ta’minoti korxonasi so‘rovnoma tushganidan keyin 1 ish kuni ichida ob’ektga chiqib, hisobga olish priborini plombalaydi.

Plombalangan kunning o‘zida iste’molchiga:

plombalash ma’lumotlari;
rasmiylashtirilgan issiqlik ta’minoti shartnomasi

elektron shaklda yuboriladi.

Iste’molchi shartnomani 5 ish kuni ichida ERI bilan tasdiqlaydi.

Yig‘imlar va chegirmalar

Davlat xizmati uchun:

DXM orqali murojaat qilinganda — BHMning 10 foizi;
YaIDXP orqali murojaat qilinganda — BHMning 9 foizi undiriladi.

Texnik shart berish, loyihani kelishish, qurilmalarning ekspluatatsiyaga tayyorligini aniqlash va hisoblagichni plombalash uchun davlat xizmati yig‘imidan tashqari alohida haq undirilmaydi.

Jismoniy shaxslar uchun:

Ijtimoiy reestrdagi «kambag‘al oila» a’zolari, davlat tibbiyot muassasalarining tibbiyot va farmatsevtika xodimlari hamda I va II guruh nogironligi bo‘lgan shaxslarga — 50 foiz;
«davlat ta’minotidagi oila» a’zolariga — 75 foiz chegirma beriladi.

Normativ hujjatlar

O‘zbekiston Respublikasi Vazirlar Mahkamasining qarori, 31.03.2018-yildagi 256-son